दिवाळी

दीपावलीच्या आगमनाने, जुळावी नाती हरवलेली,
फराळाच्या मधुर गोडव्यात, एकत्र यावी मने जपलेली..

दीपावलीच्या आगमनाने, बालपणीच्या जागाव्या आठवणी,
वारसा पुढे सोपवताना, नव्या काही घडवाव्या आनंदुनी..

दीपावलीच्या आगमनाने, सुंदर रांगोळ्या सजाव्या अंगणी,
आकाशदिव्याच्या प्रकाशाची, त्यावर पखरण सप्तवर्णी..

दीपावलीच्या आगमनाने, सुखसमृद्धी वसो तव जीवनी,
प्रसन्न सुदृढ आरोग्याचे, वरदान तुवा द्यावे धन्वंतरीनी..

दीपावलीच्या आगमनाने, सरो जळमटे खिन्नतेची,
आत्मसुखाची प्राप्ती व्हावी, उजळावा प्रकाश अंतरंगी..

धनत्रयोदशी
धन्वंतरी पूजन व यम दीपदान

ह्या वर्षीच्या दिवाळीसाठी खास धागा.
आपण येथे फराळ, सजावट, किस्से, आठवणी, फटाके, खरेदी, रांगोळी असं सर्व काही लिहूया.
Virtual दिवाळी साजरी करूया!

झब्बूचा खेळही खेळता येईल.

हा घरचा
याच्या खालच्या दशा अंधारामुळे दिसत नाहीयेत.

हा बघून मैत्रिणीने लगेच ऑर्डर दिली. तर हा तिचा

फक्त रंगसंगती वेगळी आहे बाकी सर्व सारखे.
सर्वांना दिवाळीच्या खूप शुभेच्छा!

ऐन दिवाळीत एक
मेसेज व्हायरल झाला
नको त्या उपमा
देवून गेला फराळाला

काय तर म्हणे शंकरपाळी
म्हणजे चौकस विचार
म्हणून मी शंकरपाळी
हातोडीखाली चिरडली
सुक्ष्मदर्शकाखाली निरखली
कुठेही चौकस विचार नव्हता
तोंडात टाकलेला चुराही चवीला
काहीसा शंकरपाळी सारखाच होता

लाडू, करंजी, चकली फोडवी तर
आपल्यालाच फोडेल कोणी
या चौकस विचारांनी
घेतली मी माघार तत्क्षणी

दिवाळीची सुटी तोंडावर आलेली.
हवेत गारवा वाढायला लागलेला.
दुपारचं मऊ ऊन हवंहवंसं वाटणारं.
जवळपास रिकामं झालेलं कॉलेज आणि होस्टेल.
कुठेतरी तुरळक चुकार मुलंमुली.
तेही आपल्यासारखेच निवांत.
कॅन्टीनही शांत.
किंबहुना सगळ्या हवेवरच एक उबदार, आनंदी निवांतपणा पसरलेला.
आपलं काही तरी बारीकसं काम कॉलेजमध्ये.
ते आटपून आपणही दिवाळीला घरी जायला निघणार.
अशा वेळी कॅन्टीनमध्ये अनपेक्षितपणे भेटलेला मित्र आणि त्याच्याबरोबर घेतलेला चहा.
काय रंगतात ना गप्पा अशा वेळी!

कळीकाळाचे ते | सुटले ग्रहण ||
अभ्यंगाचे स्नान | भिमातीरी ||

ऐसी पंढरीशी | साजिरी दिवाळी ||
भक्त मांदियाळी | पायरीशी ||

झाडीले अंगण | विठूने सकाळी ||
रेखाटे रांगोळी | रखमाई ||

सजले तोरण | महाद्वारी छान ||
तुळशीचे पान | गंधाळले ||

नाम गजराचा | फुटला फटाका ||
त्याचाच दणका | दाहीदिशा ||

नामाचाच लाडू | करंजी नामची ||
जाजमे भक्तीची | बैसावया ||

बैसल्या पंगती | पंढरी नगरी ||
विठू हारोहारी | वाढतसे ||

भेटली विठ्ठली | नेत्र पाणावली ||
आस निववली | हृदयीची ||

दिवाळी साठी खास रंगीत आणि सोनेरी, चंदेरी क्रोशे टीलाईट होल्डर.. मेटल वाटी आणि व्हाईट वॅक्स कँडल/गुलाब कँडल सहित उपलब्ध.. यात रेडिमेड लाईट्सही ठेवता येतात. मेटल वाटी काढता येते त्यामुळे सुशोभित वाटी सारखा उपयोग ही करता येतो. दिवाळी व्यतिरिक्त इतरवेळी देवासमोर सुका नैवेद्य किंवा फुलं ठेवायला उपयोग होतो. शिवाय हळदीकुंकू वाण म्हणून ही देता येतं. पूर्णपणे एकसंध आणि हाताने वीणलेले आहेत.

https://www.facebook.com/saarascrafts