आहे

आज मी पिणार आहे!

उतरून माळ्यावरली मी स्वप्ने जिणार आहे.
सांगून ठेवा नियतीला आज मी पिणार आहे..

चुकले होते फार माझे, हिशोब काढून ठेवा,
जमेल तर आजच सारा, चुकता मी करणार आहे!

कुठे पळाली मदीराक्षी ती, आणा शोधून,
बसवून समोर तिला, डोळ्यातून पिणार आहे!

लोक जे म्हटले वाईट मला, चुकून सामोरे येऊ नका,
दिसल्याबरोबर सांगून ठेवतो, बांबू मी सारणार आहे!

घे म्हणता वारूणी लावली ज्यांच्यासवे,
उपकार तुमचे मानायाला थेंब उडवणार आहे

चढवून घेतले दुःखास जेव्हा,
मी कोडगा जाहलो,
आज उरल्या फटाक्यांची, दिवाळी करणार आहे!

मी शृंगारतो सुखदु:खेही

ओसाड गावी सारा भूतांचाच आवाज आहे
माणसाने बोलायचे नाही... हा रिवाज आहे

रोरावतो मनातल्यामनात लाटेत प्राण नाही
नेभळा समुद्र सारा कसा विसरला गाज आहे

फुलावे कसे कळयांनी येथे पुष्करणीत आता
ऋतू बहराचा येथला कसा ... दगाबाज आहे

लाक्षागृह अजुनी कसे नाक्यानाक्यावर धुमसते
मारावयास पांडवा शकुनी ... कावेबाज आहे

खुराडेच प्रिय ज्यांना कसे आकाश कवेत घ्यावे
कोंबडीचे कुटुंबीय सारे ......... टोळीबाज आहे

मी शृंगारतो सुखदु:खेही ....केव्हाही कुठेही
कलंदराच्याच जगण्याचा माझाही बाज आहे