मुलाखत कशी वाटली.

सईची मुलाखत नाही बघितली पण गौतम जोगळेकरची मुलाखत बघितली आहे दिल के करीबमध्ये. तोही छान बोलला आहे मोकळेपणाने, त्याच्या आणि त्याच्या आईच्या नात्याबद्द्लही स्पष्ट बोलला आहे, कुठेही खोटेपणा किंवा सगळं कसं छान आहे हे दाखवण्याचा अट्टाहास नाही. मला तो आधी फुटकळ नट वाटायचा पण ही मुलाखत बघितल्यापासून आदर फार वाढला आहे त्याच्याबद्दल. फार साधा आणि खरा वाटला. पक पक पकाक त्याने दिग्दर्शीत केला आहे हे माहिती नव्हतं. त्याची बहीण विनी आता काम करत नाही का.

सईच्या मुलाखती फारच छान.
गिरिजा ओकची लल्लन टॉपवरची मुलाखतही आवडली. ती गाते, शिकते, डान्स या बद्दल माहिती नव्हतं. अन एकदम साधी सरळ छान मनमोकळं बोललीय. जरूर पहा

त्यांची दुसरी बाजु मधली पण फार सुंदर मुलाखत आहे.

सईचं पुस्तक वाचलं असेल, तरी मुलाखतीतून काही नवीन मिळणार आहे का? तर बघेन म्हणतो.

दुसरी बाजूमध्ये मुलाखतकार विक्रम गोखलेंना सहन करावं लागेल त्याचं काय?

धागा छान चालू आहे..
बघतोय एकेक..

दुसरी बाजूमध्ये मुलाखतकार विक्रम गोखलेंना सहन करावं लागेल त्याचं काय? >>>

त्यामुळेच मला अजुन एकदा ऐकायची होती तरी ऐकली नाही. गोखले उत्कृष्ट कलाकार होते, माहितीचा खजिना होते पण दुर्दैवाने दुसरी बाजुमधे रसभंग व्हायचा.

भरत, त्यांना बोलताना ऐकणे हाच अनुभव घ्यायचा आहे. ऐकतच रहावे असे वाटले होते मला.

अस्मिता, वरच्या दोन्ही छान वाटताहेत.

गोखले उत्कृष्ट कलाकार होते, माहितीचा खजिना होते पण दुर्दैवाने दुसरी बाजुमधे रसभंग व्हायचा. >>
गोखले उत्कृष्ट कलाकार होते, पण त्यांची दुसरी बाजू कंटाळवाणी होती

सई परांजप्यांच्या मुलाखतीचा पहिला भाग बघितला. छान वाटलं बघून. खरंच किती उत्साहाने आणि मोकळेपणाने बोलल्या आहेत! 'सय' वाचलं आहे त्यामुळे बऱ्यापैकी माहिती होतं पण प्रत्यक्ष ऐकायला जास्त छान वाटलं.
'येथे रँग्लर परांजपे रहात होते' अशा अर्थाचा तो नीलफलक एकदा तिथून सहज चालत जाताना दिसला होता तेव्हा एकदम भारी वाटल्याचं आठवतंय.

माफ करा. मी पुर्ण चुकीचे लिहिले आहे वर. दुसरी बाजुमधे सई परांजपेंची मुलाखत नाही. माझ्या डोक्यात विजया मेहतांचे नाव होते. (मी कपाळावर हात मारुन घेतला आहे व तुमचा तेच करण्यापासुनचा वेळ वाचवला आहे).

हे उगाच अवांतर
एखाद्या कलाकाराची व्यक्ती म्हणून बोलायची विशिष्ट ढब असेल आणि ते बोलणं पुरेसा वेळ ऐकलं असेल तर त्यांचं लेखन वाचताना मला ते त्या कलाकाराच्या आवाजात ऐकू येतं. उदा : शिरीष पै आणि पाडगावकरांच्या कविता. तसंच सईची विविधभारतीवरची विशेष गीतगंगा दोनतीन वेळा ऐकली होती. त्यातून त्यांचे स्पष्ट स्वच्छ उच्चार, मिश्कील विनोदाच्या जागेआधी येणारा हलकासा (विक्रम गोखलेंसारखा नव्हे ) पॉझ (तो विनोद प्रेक्षकांच्या डोक्यात हॅमर करायची नसलेली गरज) हे सगळं मनात ठसलं आहे. त्यामुळे सय हे पुस्तक माझ्या मनात त्यांच्या आवाजातच वाजलं.
विजया मेहतांच्या मुलाखतीही ऐकल्या आहेत. झिम्मा त्यांच्या आवाजात वाजतं का ते बघायला हवं.

आणखी अवांतर - त्या पुस्तकाचा इंग्रजी अनुवाद करता करता ते एक स्वतंत्र पुस्तकच झालं. मराठी पुस्तकात नसलेला काही भाग त्यात आला आहे. त्यामुळे तेही वाचणं क्रमप्राप्त आहे. बघू कधी जमतं.

आणखी अवांतर - रेको - शकुंतला परांजपेंचं काही आंबट काही गोड. त्यांचीही मुलाखत दूरदर्शनने घेतली होती.

सईचं सह्याद्रीवरचं हृद्गत फुरसतीत ऐकेन.

>>> विजया मेहतांच्या मुलाखतीही ऐकल्या आहेत. झिम्मा त्यांच्या आवाजात वाजतं का

हो!!!

त्यांचं लेखन वाचताना मला ते त्या कलाकाराच्या आवाजात ऐकू येतं. >> सेम हिअर ! उपहास पण ऐकू येतो आणि त्या शब्दाला काय हावभाव असतील ते ही दिसतात.

अमुक तमुक चॅनेल वरची चिन्मय दामले (बहुधा माबोकर चिनूक्स?) यांची मुलाखत पाहिली. अतिशय उत्तम आणि माहितीपूर्ण आहे.

एखाद्या कलाकाराची व्यक्ती म्हणून बोलायची विशिष्ट ढब असेल आणि ते बोलणं पुरेसा वेळ ऐकलं असेल तर त्यांचं लेखन वाचताना मला ते त्या कलाकाराच्या आवाजात ऐकू येतं. >>>
सेम!!
'सय', 'झिम्मा', 'माझे रंगप्रयोग' (रत्नाकर मतकरी) तीनही पुस्तकं वाचताना मला अशी ऐकू आली होती.

सई परांजप्यांच्या मुलाखतीचे पाचही भाग पाहिले. मस्त बोलल्या आहेत त्या. पण अर्धवट वाटली. अजून भाग असले पाहिजेत असं वाटलं. जेमतेम टेलिव्हिजनच्या सुरुवातीपर्यंत पोचलं आहे.

अमुक तमुक चॅनेल वरची चिन्मय दामले (बहुधा माबोकर चिनूक्स?) यांची मुलाखत पाहिली. अतिशय उत्तम आणि माहितीपूर्ण आहे. >>>> फारच रोचक आहे. अजून भाग हवेत..

बंदे मे है दम… | Mahamulakhat | Sameer Wankhede | Dinesh Kanji | Interview | IRS | NIA | : https://www.youtube.com/watch?v=lfkoZ6SxKVE

अलीकडेच प्रसारित झालेली गीतांजली कुलकर्णी यांची दिल के करीब मधली मुलाखत पहिली, माझी आवडती अभिनत्री आहे. मुलाखत पण सुंदर होती. दिलखुलास आणि मनमोकळे पणी छान बोलल्या आहेत.

अमुक तमुक चा भाग छान माहितीपूर्ण आहे. आवडला तो भाग. दोन्ही होस्ट मात्र गंडलेले वाटले त्यातला एक तर कंड सुटल्यागत पूर्ण एपिसोड अंग खाजवत बोलत होता अतिशय घाण आणि किळसवाणा प्रकार.

गीतांजली कुलकर्णीचा भाग ओके ओके वाटला. तिचा गुल्लक आणि कोर्ट एवढच माहीत आहे. पिया बहुरूपीया बहुदा बंद झालंय आता. पैकी कोर्ट मध्ये तिच्यापेक्षा त्या विवेकचे काम उजवे वाटले. आणि गुल्लक मध्ये सगळ्यांची कामे छान आहेत. एन एस डी असून फार काही काम केल्याचे कळले नाही मुलाखतीतून.

अमुत तमुकचा होस्ट कोण आहे? चिनूक्स एपिसोडमधला निळा शर्टवाला अगदीच येडचाप आहे. कसा हसत रहातो!!!

अ‍ॅडगुरू सांगताहेत, वर्गीस कुरियन ते गौतम अदानी…| Bharat Dabholkar | Dinesh Kanji | Interview | Amul : https://www.youtube.com/watch?v=0a4pxr1TSF8

दिलखुलास मुलाखत. भरत दाभोळकरांसारख्या अवलिया, हरहुन्नरी माणसाची मुलाखत म्हटल्यावर रोचक असणारच. मस्त किस्से सांगितले आहेत.

काही दिवसांपूर्वी सखी सह्याद्रीमध्ये बघितलेली डॉ निरूपमा देशपांडे यांची मुलाखत फार छान होती. त्यांनी मेळघाटातील आदिवासी लोकांसाठी प्रचंड काम केले आहे.
https://youtu.be/ADJz8SPG5ks?si=YVdJhL3OYC3jGDGm

ग-गप्पांचा : भाग 14 https://www.youtube.com/watch?v=Y47AHvLt13s

केदार शिंदे यांची मुलाखत आवडली. ते शाहीर साबळे यांचे नातू आहेत हे समजले.
‘ टीआरपी मशीन’ या प्रकाराबद्दल त्यांनी कुतूहल व्यक्त केलेय. त्यांनी स्वतःही ते अजून पाहिलेले नाही आणि श्रोतृवर्गापैकी ते कोणी पाहिले आहे का, असे त्यांनी विचारले !

आज बंगळुरात 'स्वयं टॉक्स' नावाचा मुलाखतींचा कार्यक्रम झाला. डॉ. उदय निरगुडकर मुलाखती घेतात. ज्यांची मुलाखत घेतली ते चौघे - प्रशांत गाडे (यांनी कृत्रिम, रोबोटिक हात-पाय स्वस्तात तयार करून कित्येकांना मोफत बसवून दिले आहेत. इंजि. ड्रॉपआऊट.)
किरण पुरंदरे- पक्षीनिरीक्षक म्हणून ते प्रसिद्ध आहेतच, पण गेली काही वर्षे पत्नी अनघाताईंसह नागझिऱ्यात राहून तिथल्या आदिवासींसाठी अनेक चांगले उपक्रम राबवत आहेत.
सारंग साठ्ये - भाडिपा. डिजिटल माध्यमात काम करणारा आणि यशस्वी झालेला. हाही सुप्रसिद्ध आहेच.
अनुराधा प्रभुदेसाई- वीसेक वर्षांपूर्वी पर्यटक म्हणून कारगिलला गेल्या असताना त्यांना जाणीव झाली की सैनिकांबद्दल समाजात म्हणावी तशी कृतज्ञता नाही. त्यानंतर त्यांनी सैनिकांसाठी खूप काम केलं आहे.

कार्यक्रम चांगला झाला. पण चार जणांच्या मुलाखती जरा जास्त होतात. दोन किंवा तीन जणांच्याच घेतल्या तर जरा जास्त खोलात जाता आलं असतं. सुरुवातीला (किका सोडून इतर तिघांनी) प्रेझेंटेशन केली त्याऐवजी त्यांच्या कामासंबंधित छोटा व्हिडिओ दाखवून उरलेलं सगळं मुलाखतीतून आलं असतं तर बरं झालं असतं.

वायफळ चॅनलवर संकर्षण कर्‍हाडेची मुलाखत कम गप्पा आहेत. मोठा २ तासाचा आहे भाग पण छान बोललाय संकर्षण. एकदम डाऊन टू अर्थ आहे.

हो चांगली आहे मुलाखत.