बडबडगीत

पिसापिसांचा कोंबडा

पिसापिसांचा कोंबडा
रंगबिरंगी केवढा

तुरा सुरेख लालेल्लाल
दिमाखदार मस्त चाल

दाणे टिपतो निवडून निवडून
किडे खातो जमिन उकरुन

ओरडतो कुकच् कु
कोंबडेभाऊ कुक्कुड कू

कोण, कोण, कोण ??

टक्मका टक्मका
बघतंय कोण ?

चळवळ चळवळ
करतंय कोण ?

मंम्मम् मंम्मम् हवीये मला
रडून रडून सांगतंय कोण ?

अाईचा हात लागता जरा
बोळकं वासून हस्तंय कोण ??

खूप वर्षांची इच्छा आहे , एखादं बडबडगीत लिहावं, अगदी सान्वी झाली तेव्हापासून. पण ते जितकं वाटतं तितकं सोप्पं नव्हतं माझ्यासाठी. आज पहिला प्रयत्न.

पाखरांची किलबिल,
पापण्यांची किलकिल,
डोळ्यावरची झोप
भुर्रर्र उडाली.

सकाळची गडबड,
डब्यांची खडखड,
सोमवार सकाळ
सुरु झाली.

आईची धुसपूस,
बाबांची खुसपूस,
तयारी माझी
काहीच नाही.

पाठीवर दप्तर,
दप्तरात बस्कर,
ड्रेसला इस्त्री
मुळीच नाही.

हातात दूध,
पायात बूट,
करतात सगळे
तैनात माझी.

बाळ उभा र्‍हायला .....

उभा उभा र्‍हाय र्‍हाय
आधाराला काय काय

टाका टाका एकेक पाय
मज्जा मज्जा येते काय

डुगु डुगु चाले कसा
छान छोटा बदकु जसा

पडे कसा बुदकन
हसु येई खुदकन