कोपरा

एक उंबरा

एक उंबरा घरा,मनाचा
जरा जरासा वाट अडवुनि
स्वस्थ बसावा

एक कोपरा घरा,मनाचा
गर्द ताटवा, अजाण वेडा
बहरुन जावा

एक अंगण घरा,मनाचे
उदारतेने अनाहूताला
देत विसावा

एक मार्ग हा घरा,मनाचा
हात धरोनी, माणुसकीचा
स्पर्शत जावा

एक झरोका घरा,मनाचा
स्वच्छ प्रकाशे लखलखणारा
तेवत जावा

एक पायरी घरा,मनाची
जाता येता, अवचितवेळी
आधार व्हावी

एक पोकळी घरा,मनाची
अथांगता अन तरीही स्तब्धता
देत विसावा

एक असोशी घरा, मनाची
अविरत धारा, उगेउगेची
देत रहावी

कोपरा,कॉर्नर

कोपरा...

एकांताचा
एकुलता एक
भन्नाट
कोपरा असावा,
पसरावे कधी
ऐसपैस पसाऱ्याने
निवांत एकट्याने
हलू नये...चुकूनही
चुकत नाहीत
माणसे जोवर...
रहावे स्थितप्रज्ञ
वटवृक्षा सारखे...

©शिवाजी सांगळे