एक उंबरा

Submitted by पुरंदरे शशांक on 12 November, 2024 - 00:12

एक उंबरा

एक उंबरा घरा,मनाचा
जरा जरासा वाट अडवुनि
स्वस्थ बसावा

एक कोपरा घरा,मनाचा
गर्द ताटवा, अजाण वेडा
बहरुन जावा

एक अंगण घरा,मनाचे
उदारतेने अनाहूताला
देत विसावा

एक मार्ग हा घरा,मनाचा
हात धरोनी, माणुसकीचा
स्पर्शत जावा

एक झरोका घरा,मनाचा
स्वच्छ प्रकाशे लखलखणारा
तेवत जावा

एक पायरी घरा,मनाची
जाता येता, अवचितवेळी
आधार व्हावी

एक पोकळी घरा,मनाची
अथांगता अन तरीही स्तब्धता
देत विसावा

एक असोशी घरा, मनाची
अविरत धारा, उगेउगेची
देत रहावी

एक वेळही घरा,मनाची
अबोल, निश्चळ अधुनीमधुनी
शांत विरावी

...........................................

पोकळी....... अवकाश
असोशी..... उत्कट इच्छा

विषय: 
लेखनसुविधा
काव्यलेखन
शब्दखुणा: 
उंबरा
कोपरा
असोशी
पोकळी
Groups audience: 
गुलमोहर - कविता
Group content visibility: 
Public - accessible to all site users
शेअर करा

सुंदर....

Submitted by दत्तात्रय साळुंके on 20 November, 2024 - 20:51