उदास

पूर्वीची मी साधा विनोद ऐकला तरी फिदीफिदी हसत असे
उंचावरून कोसळणाऱ्या धबधब्याप्रमाणे खळाळून वाहत असे ।
आता अख्खी विनोदी गोष्ट वाचली तरी हसू येत नाही
कुणी खिंकाळून हसलं तर आवडतही नाही ।।

पूर्वीची मी भुक्कड अशी खादाडी करत हिंडत असे
बिनधास्तपणे रस्त्यावर भैयाकडची पाणीपुरी हाणत असे ।
आताशा चटपटीत चाट हायजिनिक वाटत नाही
कुणी खात असेल तर आवडतही नाही ।।

पूर्वीची मी कुठलाही विषय घेऊन अखंड बडबड करत असे
अनंतकाळ वाहणाऱ्या वाऱ्याप्रमाणे वाचा यज्ञ करत असे ।
आता चुकूनही जास्त बोलायला आवडत नाही
कुणी बडबडत असेल तर आवडतही नाही ।।

मी उदास आहे म्हणूनी
तू मला बोलवावे
डोळ्यात रोखूनी काही
लटकेच रागवावे

मी उगाच टाळूनी जावे
संवाद साचलेले
तू ही न जाणवू द्यावे
ते भाव वाचलेले

शब्दा विना ही काही
नाती अशी रुजावी
सर ओसरुनी जाता
पापण्यांत जी भिजावी

मी उदास आहे म्हणूनी
तू मला बोलवावे
अन जाताना हळवे
क्षण हासरे करावे

शमा