यशोदा

गोकुळ

दान मोतीयाचं अस रानात सांडलं
भेगाळलं मन चिंब चिंब झालं
गाणं पावसाचं रिमझिम कानात वाजलं
एक झिम्माड सपान डोळ्यात साठलं

चारा मिळता हिरवा, गाय कपिला तुष्टली
राजा, सर्जानेही समाधानी डरकाळी दिली

कुस धर्तीची उजवे , पीक तरारुन आलं
झिम्मा फुगडी खेळत रान वाऱ्यावर डुलं
चांदण लेवून कणसं आभाळी गेली
दौलत कुबेराने रिती मळयावर केली

मोती पवळयाची रास अशी खळयात सांडली
चिंतातुर चेहऱ्यावर हास्य लकेर हिरवी ओली

घर गोकुळ अवघे
यशोदा ताक घुसळीती
लोणी श्रीधर चाखती
नंद कौतुके पाहती

हे गृहस्वामिनी कुलस्वामिनी
तू माझी देवता
यशोदे पदरी तुझ्या दिव्यता

कारागृही मी बंद देवकी
प्रसवुनी परीसा मी एकाकी
पदरी घेइ तेजा अनंता
तुझीच ही योग्यता

यशोधरा मायेची जननी
परी दूर माया उन्मनी
अमृतपान्हा प्राशून कान्हा
तृप्त ,तुझी सफलता

लाड गोड पुरवी कृष्णाचे
कवळ मधूर भरवी प्रेमाचे
लाघवास लाघवी ह्रद्द
घे तुझ्यावरी अक्षता