मभागौदि २०२५ शशक - स्टेयरिंग व्हील - तुष्की

दोन दिवसांनी पेपर आहे.
आजचा सुटीचा दिवस निट अभ्यास करण्यात घालवायचा,
तिने मनात ठरवले होते.

“आज तरी अभ्यास करणार आहेस का?”, या आईच्या वाक्याने दिवसाची सुरवात झाली.

तिने काय ठरवले आहे न विचारता, ती काय करणार आहे हे गृहित धरून असलेले आईचे वाक्य ऐकताच तिचे डोके सटकले.
अभ्यास करण्याची कोणतीच कृती करायची इच्छा किंवा विचाराला तिच्या डोक्यात आता जागाच उरलेली नव्हती.
सगळी जागा रागाने भरलेली.

परिस्थितीवर घरच्यांवर आणि स्वतःवर असलेला रागच आजकाल तिने काय करायचे किंवा नाही, ठरवत असतो.
तिने दिवस भर अभ्यास करायचे ठरवले होते, आता करणारच नाही
रागाने दिवसाचे स्टेयरिंग व्हील नेहमीप्रमाणे हातात घेतले पुन्हा
आजही रागच जिंकला.