धार्मिक-साहित्य

गणपती अथर्वशीर्ष

मायबोली गणेशोत्सव २०२०
श्रीगणेश हस्तलेखन स्पर्धा

नाव - अतुल पाटील
मायबोली आयडी - atuldpatil
गट 'ब'

अनेक वर्षांनी शाळेतल्यासारखी स्पर्धा आयोजित करून जुन्या आठवणी जागृत केल्याबद्दल आणि अनेक वर्षांनी हातात पेन धरायची संधी दिल्याबद्दल मायबोली गणेशोत्सव २०२० स्पर्धा संयोजकांचे मन:पूर्वक आभार _/\_ आणि भाग घेण्यासाठी पेन, पेपर, पॅड इत्यादी उपलब्ध करून दिल्याबद्दल माझ्या मुलाचे पण आभार

एक सांगते बाप्पा तुला, माझ्या मनीची खंत
तुझ्या आगमनाने व्हावा देवा, महामारीचा अंत।

तुझ्या इच्छेनुसार चाले, जगाचा हा रथ
का रे देवा खप्पामर्जी, कसली धाडलीस साथ?

तुझीच ना रे सारी पृथ्वी, करतोस ना रे फेरा?
तरी सुद्धा वाजले रे, जगताचे या बारा।

कशी झाली हालत बाप्पा, तुझ्याच लेकरांची
निसर्गावर मात करण्या, धावे मती मानवाची ।

साधन होता साध्य, शस्त्र झाले शास्त्र
अशी कशी फिरते बुद्धी, हाती येता अस्त्र।

गणराया, तूच दिला ना धडा हा अनमोल?
मानवाने निसर्गाशी साधावा समतोल।

नमो भालचंद्रा नमो एकदंता
गणेशा सुमुखा जनी विघ्नहर्ता
कृपा हो जयाची समाधान चित्ता
गिरीजात्मजा रे नमो बुद्धीदाता

अती साजिरी मूर्ती विघ्नाहराची
रुळे शुंडही, कोर माथा शशीची
प्रभा फाकली नेत्री ती दिव्यतेची
मुसावूनि लाभे गुणानिर्गुणाची

सुवर्णासवे रत्नभारे किरीटी
टिळा शोभलासे विशाळा ललाटी
फडत्कारी कर्णे वरी एकदंती
रुळे शुंड वेधी अती दिव्य कांती

मना निर्मळा हो जरी त्वत्कृपेने
प्रतिष्ठापना भालचंद्रा स्वयेने
अकारे उकारे मकारे मिळोनी
जसा निर्गुणी तू स्वभक्ता सगुणी

ध्वनी
*****

सोहमचा ध्वनी
आत उमटता
वृतीलागी दडा
पडे जेव्हा॥

तया त्या शून्यात
उरतो एकांत
पाहणारा आत
लीन होतो ॥

शब्दांविन शब्द
मनाला धरून
जाय उतरून
मनापार ॥

तेथे तो बहिरा
होत असे खरा
मातृकांच्या परा
जाऊ शके ॥

विक्रांता सहज
असतो कठीण
माय बापाविन
जन्म असा ॥

*******
डॉ. विक्रांत प्रभाकर तिकोणे
http://kavitesathikavita.blogspot.com

बळे पेलि कोदंड रक्षार्थ धर्म

जनी सज्जनी आज आनंद मोठा
अयोध्यापुरी सोहळे थोर होता
स्वये श्रीप्रभू येउनी मंदिरी या
प्रतिष्ठापिली धर्मकिर्ती ध्वजा या

बळे पेली कोदंड रक्षार्थ धर्म
झणी निर्दळी दुष्टशक्ती कुकर्म
अति प्रेमभावे स्वभक्ता सहाया
पदी राघवाच्या मनोबुद्धी काया

जनी मानसी आज संतोष मोठा
अयोध्यापुरी व्यापूनि भक्तीलाटा
जनी दावितो नित्य कर्तव्यनिष्ठा
स्मरुया गुणा राघवाच्या तदर्था

सदा अंतरी सर्वदा रामराया
जरी भाविता तोचि येतो सहाया
मुखी नाम येणे कृपा ही तयाची
समाधान हे साक्षचि जाण त्याची

पळस
*****
भर उन्हाळ्यात
रणरणत्या उन्हात
जात असता
उजाड रानावनातून
अचानक
त्या तपकिरी सुकलेल्या
हिरवट पिवळट झाडीमध्ये
दिसतो उठून..
पळस !
अरण्यातील संन्याशागत
स्थिरपणे उभा स्तब्ध
जणू साधनामस्त
आपल्यातच मग्न
अंगावरील काट्याचे
जीवनातील ओरखड्यांचे
हरवून भान
लावून ध्यान
प्रखर उन्हात
जणू तळपत
तपस्येच्या तेजानं
सारे आसमंत
विखुरल्या पानांचे
निष्पर्ण देहाचे
हरलेल्या लढ्याचे
असते अगतिक मूक मलुल
सारे काही हरवून
सारे काही टाकून .

कापुराची माया
************
कापुराची माया
आगीला कळावी
समरस व्हावी
मिठी मग ॥

तैसी घडो भेटी
देवा तुझी माझी
हौस नसण्याची
पुरवावी ॥

मिठाची बाहुली
भेटावी सागरा
भेदाचा पसारा
नुरुनिया ॥

तैसे घडो काही
जिवलगा नेई
आणुनिया पाही
प्राण डोळा ॥

सरो देह भाव
जळो मन राव
निरंजनी ठाव
देई मज ॥

दत्ताचे घर!
**********
माझिया दत्ताचे
घर किती न्यारें
चंद्र सूर्य तारे
छपराला ॥
माझिया दत्ताचे
दार किती न्यारे
जगताचे वारे
वाहे त्यात ॥
माझिया दत्ताचे
अंगण विश्वाचे
आकाशगंगेचे
विलक्षण ॥
माझिया दत्ताच्या
गूढ माळ्यावर
अद्भूत विवर
कृष्णमेघी ॥
माझेया दत्ताच्या
रंग तो भिंतीचा
नित्य नाविन्याचा
क्षणोक्षणी ॥
दत्ताच्या घरात
दत्ताला शोधत
राहतो फिरत
तरीसुद्धा ॥

**