बदलून

चिऊताई चिऊताई..

चिऊताई, चिऊताई,
उगा का रुसतेस बाई

खाऊ देईन मूठभर
भरभर चिव् चिव् कर

नाचत रहा अंगणभर
बाळ बागडेल तेथवर

मम्म्म् होईल भरभर
जाऊ नको दम धर

थोडी तरी चिवचिव कर
हसू फुटेल बोळकंभर...

श्रावण दारी....

श्रावण दारी मना हुरहुरी....थांब ना सख्या जरा क्षणभरी

श्रावण वैरी साजण दूरी.....गळा हुंदका नजर भिरभिरी

श्रावण रानी लखलख पानी....दिठी विस्फारे लक्षदर्पणी

श्रावण झारी रेशीमधारी....सरसर येता फिर माघारी

श्रावण किरणे जादूभरली.....सप्तरंग लेऊन ये खाली

श्रावण ताजा गंधित हिरवा...... चहुबाजूंनी बरवा बरवा

श्रावण गाणे मधुर तराणे.....अंतरी आलापींचे लेणे

श्रावण कान्हा राधा अवनी....टिपरी वाजे थेंब होऊनी

जमलेच तर हसून पाहू कधी तरी खळखळून
नाही तर आहेच की उसने हसू ओढून ताणून

जमलेच तर फुलून येउ कधी तरी रसरसून
नाही तर आहेच की काटे-कुटे इथून तिथून

जमलेच तर गाऊन घेऊ कधी तरी मनापासून
नाही तर आहेच की तप्तसूर सदा उंचावून

जमलेच तर नाचून पाहू कधी तरी मोकळे होवून
नाही तर नाचतोच आहोत कुणाच्या तरी तालावर बाहुले बनून

जमलेच तर रडून घेऊ कधी तरी गदगदून
नाही तर आहेच नेहेमीचे नाटक नुसते मुसमुसुन

जमलेच तर देउ टक्कर कधी संकटा नजर भिडवून
नाही तर आहेच की बुजगावणे मान खाली पाडून

श्रावण सरी

श्रावण सरी गमतीच्या...... गमतीच्या
ऊन्हातंच नहायच्या....... नहायच्या

श्रावण ऊन्हं उनाड फार....... उनाड फार
इंद्रधनुवर होती स्वार्.... होती स्वार

श्रावण सरी अल्लडशा........ अल्लडशा
उड्या मरिती पोरी जशा........ पोरी जशा

श्रावण थेंब नाजुक गं...... नाजुक गं
पाचू चमकती भवती गं...... भवती गं

श्रावण फुले इवलाली...... इवलाली
बाळाच्या गाली खळी....... गाली खळी

श्रावण अपुला सखा जरि...... सखा जरि
निघून जाई स्वप्नापरि...... स्वप्नापरि