शुद्ध भाव

भक्तपराधीन

नाही भुलत स्तुतीला
ना ते बाह्य दिखाव्याला
शुद्ध भाव उमजोनी
विठू येई चाकरीला

काय कुंभार तो गोरा
जाणे काय स्तुती मोठी
शुद्ध भाव घाली धाक
देव मळतसे माती

नसे जनाबाईपाशी
पंचपक्वान्न जेवण
रानी तिच्यासंगे हरी
पायी फिरे वणवण

माळी सावता महान
आवडीने नाम घेई
मळा राखण्यास काठी
सर्सावून देव जाई

एकनाथा घरी देव
पाणी भरी कावडीने
शेले कबिराचे विणी
फेडी दामाजीचे देणे

विठ्ठल कृपा

विठ्ठलाची कृपा होता । मिटे संसाराची चिंता ।

अंतरात भाव शुद्ध । मुखी नाम स्वतःसिद्ध ।

नाठविते धन मान । हरीपायी नित्य लीन ।

संतसंगाचा हव्यास । समाधान अनायास ।

वाणी मृदू नवनीत । जाई अंतरे निववित ।

ऐसा भेटता सज्जन । जाऊ सहजी उद्धरून ।।

....................................
नवनीत = लोणी
सज्जन = सत् तत्वात राहणारा