नारळीभात (जुन्या मायबोलीवरुन)

Submitted by स्वाती_आंबोळे on 30 July, 2009 - 09:47
naralibhat
प्रत्यक्षात लागणारा वेळ: 
२० मिनिटे
लागणारे जिन्नस: 

२ वाट्या तांदूळ
२ वाट्या गूळ
१ वाटी नारळाचा चव
४ वाट्या पाणी
तीन चार लवंगा
वेलचीपूड, केशर
आवडीनुसार बेदाणे, बदाम काप, काजू तुकडे

क्रमवार पाककृती: 

तांदूळ धुवून निथळून ठेवा. मग प्रेशरपॅनमध्ये तुपावर लवंगांची फोडणी करुन त्यावर तांदूळ परतून घ्या. त्यात खोबरे घालून पुन्हा दोन मिनिटे परता, मग पाणी (आधणाचे घातल्यास उत्तम) आणि गूळ घालून ढवळा. कडेने थोडे तूप सोडा. वेलचीपूड, केशर घाला. प्रेशरपॅनचे झाकण लावून दोनतीन शिट्ट्या आणा. झाकण निघाले की वरून बदाम काप, बेदाणे, आवडत असल्यास काजूचे तुकडे इत्यादी घाला.

या प्रकारात भात नीट खुटखुटीत शिजवणे, शिजल्यावर ढवळताना शीत मोडू न देणे इ. टेन्शन्स न राहता उत्तम मऊ, मोकळा आणि अखंड शितांचा भात तयार होतो.

वाढणी/प्रमाण: 
४ जणांसाठी
अधिक टिपा: 

ही प्रमाणं तुम्ही वापरत असलेला तांदूळ आणि तुमची गोडाची आवड यानुसार बदलावी लागतील. मी इथे टिल्डा बासमती तांदूळ वापरते.

जुन्या मायबोलीवरील माहितीचा दुवा
नारळी भात

माहितीचा स्रोत: 
आई
आहार: 
शाकाहारी
पाककृती प्रकार: 
गोड पदार्थ
भाताचे प्रकार
प्रादेशिक: 
पारंपारीक मराठी
शब्दखुणा: 
नारळी भात
खोबर्‍याचे प्रकार
Groups audience: 
पाककृती आणि आहारशास्त्र
Group content visibility: 
Public - accessible to all site users
शेअर करा

आली का नारळी पोर्णिमा?? Happy
मला कुणीतरी नारळ वड्यांची / खोबर्याच्या वड्यांची रेस्पी द्या.

Submitted by सस्मित on 22 August, 2018 - 05:18

मला कुणीतरी नारळ वड्यांची / खोबर्याच्या वड्यांची रेस्पी द्या.>>>> १ वाटी ओ.खोबरे,पाउण वाटीपेक्षा थोडं जास्त, चिरलेला/किसलेला गूळ एकत्र करून जाड बुडाच्या कढईत्/नॉनस्टिक भांड्यात घालून,मंद आचेवर ठेवावे.मधून मधून ढवळावे नाहीतर गूळ करपेल.जरा जाडसर होत आले की वेलची पावडरघालावी.सुका मेवा (ऐच्छिक) घालावा.मिश्रण कडेपासून सुटू लागले की तूप लावलेल्या ताटावर गूळ खोबर्‍याचा गोळा थापणे.गरम असतानाच वड्या कापणे.

साखर घालायची असेल तर तर हीच पद्धत.त्यात उकडलेला बटाटा कुस्करून घालतात.मला गुळाचा खमंगपणा आवडतो. त्यामुळे मी गूळ वापरते.

Submitted by देवकी on 22 August, 2018 - 05:56

देवकी धन्यवाद. मला साखरेच्या करायच्या आहेत.
मी नेहमीच साखरेच्याच पाहिल्या / खाल्ल्या आहेत.
गुळाच्या म्हणजे मग ते मोदकाचं सारण झालं ना. Happy

Submitted by सस्मित on 22 August, 2018 - 06:06

नारळी पौर्णिमा आली वाट्ट जवळ
<<
हो ना.
काही स्पेसिफिक सणांच्या वेळी वर येणार्‍या हातखंडा पापिलवार रेस्प्यांपैकी इबांची ही एक.
लय भारी!

Submitted by आ.रा.रा. on 22 August, 2018 - 11:26

काही स्पेसिफिक सणांच्या वेळी वर येणार्‍या हातखंडा पापिलवार रेस्प्यांपैकी इबांची ही एक>>> +१

आणि संक्रांतीला सिंडरेलाची करायला गेले गूळपोळी रेस्पी.
दिवाळीला स्वाती आंबोळेंचीच पारंपारीक भारतीय नवर्यांiची ... आय मीन बेसन लाड्वांची Lol
हिट रेस्प्या आहेत ह्या.

Submitted by सस्मित on 23 August, 2018 - 04:40

युडिकेन, आहार-प्रणाली, चायना स्टडी तसेच जॅक ललान बद्दल वाचून नारळी भाताचा बेत रद्द केला आणि नारळी किन्वा करायला घेतला. साखरेची चिमूटपण नाही.

Submitted by मानव पृथ्वीकर on 26 August, 2018 - 03:38

काल ह्या रेसिपीने नारळीभात केला. कुकर मध्ये करायचा म्हटल्यावर माझ्या बाईने भुवया वर केल्या, गिच्चगोळा होईल म्हणे. म्हटले करून बघूया काय होते ते. पण अगदी व्यवस्थित झाला. पाणी अडीज वाट्या घेतले.

Submitted by साधना on 26 August, 2018 - 04:03

मी आज या कृतीने इन्स्टापॉट वापरून केला नारळीभात. सॉटे मोड वर तांदूळ, लवंगा , खोबरे वगैरे परतून मग मॅन्युअल मोड वर ८ मिनिटे प्रेशर कुक केला. पाणी दुप्पट घातले. उघडल्यावर जरा हलवून फुलवून घेतला. मस्त झाला आहे, चिकट नाही आणि कच्चट पण नाही.

Submitted by maitreyee on 26 August, 2018 - 12:28

.

Submitted by भरत. on 14 August, 2019 - 02:03

काल ह्या पध्दतीने नारळीभात केला.

तांदूळ १ वाटी (कोलम)
गूळ १ १/२ वाटी
पाणी ४ वाट्या
नारळाचा चव १ वाटी

बाकी काजू, बदाम, लवंगा, दालचिनी, तूप वापरले.
सुरेख झाला होता.

Submitted by विनिता.झक्कास on 16 August, 2019 - 01:23

मी आज केला नारळीभात तुमची कृती वापरून .. एकदम मस्त झाला.. झटपट. आणि चविष्ट... मी ओला नारळ घातला.. म्हणजे तो फक्त मोदक.. किंवा कारंज्यासाठी वापरतात तो.. नेहमी मिळत नाही.. मला मिळाला....नारळ नाही घातला तर केशरभात हि असाच करता येईल .. करून बघेन..

Submitted by श्रवु् on 3 August, 2020 - 05:01

प्रेशरपॅनची कल्पना मस्त आहे हे यापूर्वीच सांगितले आहे.मस्त नारळीभात झाला.
३ वाट्या तांदूळ
६ वाट्या पाणी,१.५ वाटी नारळाचे दूध.१.५ वाटी नारळ(खवलेला)

Submitted by देवकी on 3 August, 2020 - 05:40

Pages