म्हणे हर्पा, करितो वारी
Submitted by हरचंद पालव on 10 July, 2022 - 00:54
चला पंढरीला जाऊ
पांडुरंग डोळां पाहू,
विठूराय डोळां पाहू ||
गाऊ चंद्रभागातीरी
टाळ-मृदुंग गजरी ||
संत-सज्जनांचा मेळा
थोर आनंद सोहळा ||
पहा पहा आला क्षण
देत विठूराय दर्शन ||
तोचि पुण्यपर्वकाळ
घोष विठूनामावळ ||
शीण जन्मांतरिचा जाई
भक्त-भाव एकचि होई ||
काहि नुरे मी-तू-पण
होय विठूमय मन ||
विठूनामाचाचि ध्यास
विठू भारे अवघा श्वास ||
बाह्य देह पंढरपुर,
पांडुरंग अभ्यंतर ||
म्हणे हर्पा, करितो वारी -
कल्पनेने घेत भरारी ||
