वैभव जोशी

या आठवड्यात बॉस्टनला होणार्‍या बृहन्महाराष्ट्र मंडळाच्या अधिवेशनात कवी किशोर कदम उर्फ सौमित्र आणि वैभव जोशी यांची काव्यमैफल सजणार आहे. या मैफिलीत आपल्या सुरांनी बहार आणणार आहेत प्रख्यात गायक दत्तप्रसाद रानडे.

वैभव जोशी यांच्या कविता हा खरंतर न संपणारा विषयच. बोरकर, सुरेश भट इत्यादी पूर्वसुरींचे ऋण जोशी स्वतः मान्य करतात, पण त्याचवेळी या सर्वांपेक्षा भिन्न अशी स्वतःची कविता त्यांनी प्रस्थापित केली आहे. 'तुम्हांला कविता कशा सुचतात?' या कवीला विचारल्या जाणार्‍या हमखास प्रश्नाचं उत्तर त्यांनी काव्यरूपातच दिलं आहे -

धरतीवर उमटत गेल्या अलवार उन्हाच्या ओळी

काही वर्षांपूर्वी सातत्याने आणि आता सणासुदीला मायबोलीवर भेटणा-या वैभवची मुलाखत घेण्याचं जेव्हा ठरलं तेव्हा मनात बरेच प्रश्न होते. 'पाऊलवाट'मधल्या गाण्यांबद्दल बरंच काही ऐकून, वाचून झालेलंच होतं. इतर संभाषणात बरेचदा गप्प असणारा वैभव, कवितांचा (मग त्या कुणाच्याही असोत) विषय निघताच किती भरभरून बोलतो हे अनेकदा पाहण्यात आलं होतं आणि झालंही तसंच .

मायबोलीवर कविता लिहिता लिहिता आता एक गीतकार म्हणून मायबोलीला मुलाखत देताना कसं वाटतं ?