वेशीवर

पाऊस असा बैरागी

पाऊस असा बैरागी
वेशीवर येतो नकळत
रवितेज प्रखरसे अडवी
बाहूते बळकट पसरत

मेघांचे कुंतल भाळी
नेत्रातून चमके वीज
हलकेच डफावरी थाप
चहू दिशात उमटे साद

गिरिशिखरे निथळुन काढी
दरिखोरी भिजवून जात
ओढ्यातुन खळखळणारे
गुढ गभीर अनाहत गीत

झोळितून उधळे मोती
फेकीतो स्वैर झोकात
ते दान अनामिक गहिरे
साठवी धरणी उदरात

दमदार पाउले टाकी
तरुवेली झुकवुनी जात
हळुवार चाल कधि याची
मोडेना ईवली पात