कोरोनाची लाट

कालचक्रा आली गती
प्राण देहा नाकारती
जीव जीवनावरती
भार झाले !!

येता कोरोनाची लाट
फुटे पावलांना वाट
मग नदी नाले घाट
पार झाले !!

ये खबर कानो कानी
आता भेटावे दुरुनी
बंद एकमेका झणी
दार झाले !!

नाही जीवनाची क्षिती
जगण्याची रणनीती
मग उपेक्षांचे किती
वार झाले !!

सुटे धीराची संगती
झाला दीन मूढमती
आले नकार सोबती
यार झाले !!

विश्वरूप विश्वेशाचे
हात झाले आधाराचे
तिथे डोळा आसवांचे
हार झाले !!