मायबोली माध्यम प्रायोजक असलेल्या 'पितृऋण' या चित्रपटाच्या निमित्तानं जाहीर झालेल्या स्पर्धेत भाग घेतला आणि ध्यानिमनी नसताना, चक्क चित्रपटाच्या शुभारंभाच्या खेळाची दोन तिकिटं मिळाली. या बद्दल सर्वात पहिल्यांदा मायबोली चे मनापासून आभार.
पशुवैद्यकशास्त्रामध्ये शल्यविशारद असणारे नितीश भारद्वाज यांना दिग्दर्शनाची आणि अभिनयाची विशेष आवड होती. त्यातूनच त्यांनी अनेक दूरचित्रवाणी मालिका आणि नाटकांमध्ये काम केलं. अभिनेता म्हणून त्यांची ओळख अधिक असली तरी त्यांनी भारतामध्ये आणि परदेशातही अनेक दूरचित्रवाणी मालिका आणि अनुबोधपट दिग्दर्शित केले असून, परदेशात, विशेषत: ब्रिटनमध्ये, रेडिओसाठी दिग्दर्शनही केलं आहे.
पुरातत्त्वशास्त्राचे प्राध्यापक असणार्‍या व्यंकटेश कुलकर्ण्यांना एक दिवस अचानक दिसते हुबेहूब त्यांच्यासारखीच दिसणारी एक व्यक्ती. कुलकर्णी अचंबित होतात आणि शोध घेत एका वेगळ्याच रहस्याच्या मुळाशी जाऊन पोहोचतात. मग सुरू होतो भावनांचा कल्लोळ!
त्या व्यक्तीचा व्यंकटेश कुलकर्ण्यांशी काय संबंध?
तुटलेल्या मानवी नात्यांना पुन्हा एकत्र बांधून, वडिलांच्या ऋणातून मुक्त होण्याची एका मुलाची धडपड म्हणजे ’पितृऋण’!
आयएमई मोशन पिक्चर्स निर्मित व नितीश भारद्वाज दिग्दर्शित 'पितृऋण' हा चित्रपट लवकरच प्रेक्षकांच्या भेटीला येत आहे.
कृष्णाच्या भूमिकेमुळे घराघरांत पोहोचलेले व दोनदा खासदार असलेले श्री. नितीश भारद्वाज या चित्रपटाद्वारे दिग्दर्शक म्हणून पदार्पण करत आहेत.
विशेष म्हणजे हा चित्रपट ख्यातनाम लेखिका श्रीमती सुधा मूर्ती यांच्या कादंबरीवर आधारित आहे.
अजून एक आनंदाची बाब म्हणजे तमाम चित्रपटरसिकांच्या लाडक्या अभिनेत्री तनुजा या चित्रपटाद्वारे पुन्हा एकदा मराठीत झळकणार आहेत.
