संथ चालती ह्या मालिका, त्यांच्यावरची आमची टिप्पणी ऐका

आज मोठ्या उत्सुकतेने कलर्स चेनेल वर 'शनि' चा पहिला एपिसोड पाहिला. एक एपिसोड एक तासाचा आहे. सुरुवात नेहमीप्रमाणेच देव-दानव युध्दाने झाली. आजकाल देवांना बरे दिवस आलेत. बरेच मसल्सवाले सैनिक दिसत होते. बहुतेक स्वर्गात जिम उघडले असतील. बहुतेक दानव 'लॉर्ड ऑफ द रिंग्ज' मधला कोण तो सारोमान का कोण असतो त्याच्या आर्मीतल्या सैनिकांसारखे दिसत होते. दानव आणि शुक्राचार्य ह्यांना स्वर्गात यायचं होतं. देव ह्याच्या विरोधात. शुक्राचार्य म्हणतात की स्वर्ग नाही तर कामधेनु आणि कल्पवृक्ष तरी दया. हे म्हणजे थेट भारत-पाकिस्तान सारखं झालं. त्यात इंद्राच्या नुसत्या वल्गना बघून घ्याव्यात. शुक्राचार्यांनी 'वॉर ऑफ द वर्ल्ड'मध्ये कशी जमिनीतून मशीन्स येतात तसा जमिनीतून एक धिप्पाड राक्षस काढला. इंद्राचा आता पचका होणार इतक्यात सूर्य अवतरला.

सूर्य इथे येण्याआधी त्याचं राजवाड्यात त्याची बायको संध्या हिच्याबरोबर भांडण झालं. आधी संध्या तिच्या यम आणि यमी ह्या बाळांसोबत दाखवली. दासी सांगत आली की सूर्याने औक्षण करायला बोलावलंय. म्हटल्यावर तिचा चेहेरा पडला. मग घाबरत घाबरत गेली सूर्याकडे. त्याला तिलक लावला तर हिचा हात जळजळायला लागला. काय तर म्हणे हिला सूर्याचा दाह सहन होत नाही. मी हैराण. दोन पोरं झाली कशी?? तिने सुर्याला ह्यावर उपाय करायची विनंती केली. तो म्हणाला ते तुझं तू बघ. आणि युध्दाला निघून गेला. टिपिकल नवरा. युध्दात तो, इंद्र आणि शुक्राचार्य मिळून सगळं ब्रह्मांड जाळणार हे लक्षात येताच भगवान शंकरांची एन्ट्री झाली. शंकर ओळखीचे वाटले. म्हणजे फोटोतून नाही हं. आधी कुठल्या तरी सिरीयलमध्ये शंकर म्हणूनच पाहिलंय. सगळ्यांनी आपापली बाजू मांडली. शंकर म्हणाले की लवकरच पृथ्वीवरच्या जीवांच्या पापपुण्याचा हिशोब करणारी शक्ती जन्माला येणार आहे (मला वाटत होतं हे डिपार्टमेंट चित्रगुप्ताचं आहे). तोवर युद्ध थांबवा. आता त्याचा ह्यांच्या युद्धाशी काय संबंध मला काही कळलं नाही. शंकर एव्हढंही म्हणाले की आता पृथ्वी आणि मानव ह्यांच्या निर्माणाची वेळ आली आहे. अरे, ते अजून जन्माला यायचे आहेत आणि आधीच निवाडा वगैरे काय? हे म्हणजे प्रॉडक्ट बनायच्या आधीच टेस्ट सिस्टीम तयार. असो.

इथे संध्या गेली बापाकडे. तिचा बाप म्हणजे विश्वकर्मा. त्याला म्हणते मला नवर्याचं तेज सहन होत नाही. आता हे काय बापाला सांगायचं? आधी त्यानेही हात झटकले. मग म्हणाला की तुला पोराना-नवर्‍याला सोडून तप करावं लागेल. तो इंद्रासाठी शस्त्रं बनवण्याच्या खटाटोपात. एव्हढ्यात त्याला एक शोध लागला अश्या द्रव्याचा जे एखाद्या गोष्टीच्या सावलीवर टाकलं की गोष्टीची कार्बन कॉपी तयार. संध्या ते द्रव्य घेऊन गेली. बापाला न सांगता. मग लगोलग ते आपल्या सावलीवर टाकून आपली प्रतिकृती बनवली तिने.

इथे सूर्य युध्द संपवून आला तर समोर ही छाया उभी. त्याला वाटलं संध्या आहे. त्याने बोलता बोलता तिच्या खांद्यावर हात ठेवला. तिला काही झालं नाही. तो तिला खोदुन खोदून विचारणार एव्हढ्यात कोणीतरी बोलवायला आलं म्हणून तो गेला. मग संध्या तिला म्हणाली की सूर्याला काही सांगू नको. तू इथे राहून माझ्या मुलांना सांभाळ. मी तप करायला जाणार. छाया म्हणाली बाळ आणि सूर्य दोघांची काळजी घेईन. तर संध्या म्हणते कशी की सूर्यास्त झाला की छाया नाहीशी होते. सो आफ्टर सनसेट नवऱ्याजवळ फिरकायचं नाही. आता बघा, सूर्याला काही करायचंच असेल तर रात्र काय आणि दिवस काय, नाही का? असो. मग संध्या निघून गेली.

इथे सूर्य परत आला. आणि म्हणाला की आता विश्रांती नाही का घ्यायची? हे चान्सपे डान्स करणं झालं. मला वाटलं छाया म्हणणार माझं डोकं दुखतंय. पण ती म्हणाली की बाळ झोपलं नाहीये. लगेच सूर्य म्हणतो कसा, तू आई असलीस तरी पत्नीसुध्दा आहेत. नवर्याप्रती तुझी काही कर्तव्यं आहेत. वा रे नवरोबा! आपलं काही कर्तव्य नाही, नुसते अधिकार दिसतात. मग काय छाया गेली त्याच्या कक्षात. दरवाजा बंद झालां. मग एकदम लोक नाचताना दाखवले. सुर्याला पुन्हा एक मुलगा झाला म्हणून. सूर्याने बाळाचा चेहेरा पाहिला आणि माझं एव्हढं कुरूप काळं बाळ नसणार म्हणून बायकोला चरित्रहीन म्हणून मोकळा. छाया खरं तर संध्याइतकीच गोरी दाखवली आहे. मग बाळ काळं झालं कसं हे मलाही कळत नाहिये.

देवा रे!

मला आधी असं वाटायचं की तुम्ही इच्छाधारी साप होण्यासाठी तुमचे आई आणि वडिल दोघे इच्छाधारी साप असणं आवश्यक आहे. पण तसं नाहिये. 'नागिन सिझन २' नुसार नुस्ती आई इच्छाधारी नागिण असली तरी पुरे. बाप काही असला तरी फरक पडत नाही. तसंच वयाची १८ वर्षं पूर्ण व्हायच्या आत तुमचं लग्न झालं तर तुम्ही इच्छाधारी नागिण होत नाही. हा नियम मुलाला लागू पडतो का नाही माहित नाही. कारण अजून 'नाग' नावाची सिरियल आलेली नाही. एकूणात इच्छाधारी नागिणीला जेव्हढा भाव आहे तेव्हढा इच्छाधारी नागाला नाहिये.

हे नाग-नागिण कधीही कोणाचंही रूप घेऊ शकतात. म्हणजे आत्ता जॉनी लिव्हर तर लगेच मधुबालासुध्दा होतील. बाई किंवा पुरुष काहीही होऊ शकतात. नाग असताना त्यांच्या अंगावर कपडे नसतात (इश्श!) आणि माणूस झाले की कपडे, बायका असतील तर दागिने, मेकअप, खोट्या पापण्या सगळं काही क्षणात येतं. त्यांचे आवाजसुध्दा ज्याचं रूप घेतलंय त्याच्यासारखे होतात. नागातून माणूस होताना फटकन चेंज होतात. पण माणसातून नाग होताना ह्यांना गुडघ्यांवर बसावं लागतं. (पहा 'नागिन'). फारच लहर आली तर जोडीने असताना शरीराचा वरचा भाग माणसाचा आणि खालचा नागाचा असं ड्युएल सिमकार्ड असलेल्या फोनसारखं रुप पण घेतात. तसं करून त्यांना नेमका काय फायदा होतो ते त्यांनाच माहित.

फावल्या वेळात हे शंकराच्या पिंडीसमोर तावातावाने बोलणे, पायापर्यंत पांढरी दाढी असणार्या एखाद्या गुरुदेवाला आपल्या समस्येचं निराकरण करण्यासाठी पिडणे किंवा नागमणीचं रक्षण करणे ह्यासारखे उद्योग करतात.