शशक पूर्ण करा २ - चकवा - कविन

गाडीत एकटी, दूरचा प्रवास आणि हवी ती गाणी लावायचं स्वातंत्र्य. अजून काय हवं असं वाटत असतानाच समोर लक्ष गेलं आणि…रिफ्लेक्स ॲक्षनने कच्चकन ब्रेक दाबला जाऊन कचकचीत शिवी बाहेर पडली

मगाशी इथूनच पुढे गेले ना मी? go slow चा बोर्ड आणि 'क्षणभर विसावा' हॉटेल दाखवणारी पाटी मगाशी पण दिसली होती.

चकवा असावा? की अल्कोहोल लेव्हल जास्त झाल्याने डिरेक्षनचा सेन्स गंडलाय? पण अल्कोहोलला हात लावूनही दहा दिवस होतील आता.

परत च्यायला तोच बोर्ड आला 'अपघाती वळण' आणि 'go slow'. हा त्याच त्या वर्तुळात फिरणारा प्रवास अजून कदाचित ३ दिवस. तेराव्याला कदाचित मुक्तीदिन? कदाचित परत प्रवास. सगळच कदाचित, इथला चकवा संपून मोक्ष मिळेपर्यंत.