सोळा आण्याच्या गोष्टी - डोह - महाश्वेता

हणमंत्या डोहात उतरला.
"नीट रं." पाटील आरडला.
"दहा वर्षापासून हेच काम करतुय. काय नाही होणार."
पाटील वर सिगारेट फुकत होता.
"फौजदार, वढणार का?"
फौजदाराने हातानेच नाही असा इशारा केला.
"सापडलं..."
पाटील सरसावला, त्याने सिगारेट फेकली.
हणमंत्याने जोर लावून प्रेत वर काढलं.
फौजदाराने गाडी आणली. टम्म फुगलेलं प्रेत टाकलं. पंचनामा सुरू झाला.
फौजदाराने दहा रुपये बक्षिस दिलं. हणमंत्याने कपाळाला लावलं.
फौजदार निघाला. शिपाईही निघाले. फौज पार लांब गेली.
खाड!!!!!
हणमंत्याचा गाल काळानिळा झाला.
"पुढल्या येळला जरा इकडतिकडं शोध, येळ लाव, मग प्रेत सापडव. नाहीतर फौजदार दोघांनाबी शक घेऊन आत टाकल."
रागाने लाला झालेल्या पाटलाने राजदूतला किक मारली, आणि तो सुसाट निघाला!!!!