डोळ्यांत उजळते स्वप्न (भवानी वृत्त)

Submitted by माउ on 7 May, 2019 - 18:00

ओसरते शांत दुपार उन्हाचा भार नभाला होतो
सांजेची उसवुन शीव सूर्य रेखीव नव्हाळी देतो

वाळूत पसरते लाट थेंब मोकाट नाचुनी जाती
काठास बिलगते ओल अंतरी खोल आर्जवे उरती

पाण्यात चिमुकले पाय पांढरी साय स्पर्शिण्या जाती
थेंबांची होता फुले हरखुनी मुले वेचुनी घेती

मातीत खेळते पोर कुणी चितचोर स्वप्न आवरते
अलवार गुंफते ऊन तिच्याहातून सांज सावरते

केसांत अबोली फूल सुगंधी भूल वा-यात वाहे
नाही जगताचे भान तिला अभिधान नभाचे आहे

ती टपोर हसते खास निरागस आस होतसे बाधा
खेळात हरवुनी जात उरे सा-यात सानुली राधा

डोळ्यांत उजळते स्वप्न, तिच्यातच मग्न, सांधते माती
मातीत उभा श्रीरंग, दिसतसे दंग, चिमुकल्या हाती

- रसिका

विषय: 
काव्यलेखन
शब्दखुणा: 
श्रीरंग
लाट
दुपार
Groups audience: 
गुलमोहर - कविता
Group content visibility: 
Use group defaults
शेअर करा

ती टपोर हसते खास निरागस आस होतसे बाधा
खेळात हरवुनी जात उरे सा-यात सानुली राधा

डोळ्यांत उजळते स्वप्न, तिच्यातच मग्न, सांधते माती
मातीत उभा श्रीरंग, दिसतसे दंग, चिमुकल्या हाती

अप्रतिम! खुप छान!
आवडली.

Submitted by हरिहर. on 7 May, 2019 - 19:21

मस्स्तच !! खूप आवडली !

काठास बिलगते ओल अंतरी खोल आर्जवे उरती >> हे निव्वळ अप्रतिम
उन्हाचा भार, सांजेची शीव, आर्जवे, राधा - श्रीरंग! सुंदर आहे सगळं काही>>+१११

Submitted by anjali_kool on 8 May, 2019 - 08:50