वृध्दांसाठी रूग्ण-शुश्रुषा व पुनर्वसन केंद्रे

धन्यवाद Srd!

पेशंटच्या नातेवाईकांनी पेशंटला भेटायची वेळ ठराविक असली तरी कुटुंबियांनी अधून मधून अनपेक्षितपणे व ठराविक वेळ वगळून पेशंटला भेट द्यावी. (पेशंटचे विश्रांतीचे व फिजिओचे तास वगळून). त्यामुळे पेशंटची काळजी नीट घेतली जात आहे ना, हे बघता येऊ शकते. पेशंट शुध्दीत असेल वा बोलू शकत असेल, मनस्वास्थ्य ठीक असेल तर तक्रार नोंदवू शकतो. पण बेशुध्दावस्थेत, बोलू शकत नसलेला किंवा मनस्वास्थ्य ठीक नसलेला पेशंट तसे करू शकत नाही. त्या वेळी जास्तच काळजी घ्यावी लागते.

मायबोलीकर समीर देशपांडे यांनी शेअर केलेली माहिती इथे त्यांच्या परवानगीने देत आहे :

१. कोणतेही पुनर्वसन / शुश्रुषा केंद्र असो, किंवा घरी पेशंटची शुश्रुषा करत असाल तरी बेड सोअर्सची काळजी अतिशय महत्त्वाची आहे. बेड सोअर्स होऊ नयेत म्हणून काही स्पेशल पावडरी, सोल्युशन्स मिळतात. (आणखी एका ठिकाणाहून बेड सोअर्स होऊ नयेत म्हणून पॅचेसही मिळतात असे ऐकले आहे.)

२. शुश्रुषा केंद्रातल्या नर्सिंग स्टाफला इंग्लिश कळत असेलच असे नाही. औषधांसाठी वेगवेगळ्या पेट्या / बॉक्सेस बनवा व त्यांवर स्पष्ट, ठळक खुणांसह औषधे गोळ्यांसंबंधी सूचना, डोसेस वगैरे माहिती मराठीत व इंग्रजीत सुवाच्य अक्षरात लिहा.

३. शुश्रुषा केंद्राखेरीज तुम्हांला अशी काळजी घेणारी ठिकाणे, संस्था, सेवा हव्या असतील तर Geriatric Care in Pune हे शब्द वापरून गूगल करा. बरेच रिझल्ट्स मिळतील. रेटिंग्ज, रिव्ह्यूज वाचून मगच ठरवा. त्या संस्थांकडून त्यांच्याकडून सेवा घेतलेल्या काही व्यक्ती / त्यांचे नातेवाईक यांचे नंबर्स घेऊन त्यांचा फीडबॅक अवश्य विचारा.

४. पानशेत येथे असलेल्या जनसेवा फाऊंडेशनतर्फे चालवले जाणारे शुश्रुषा केंद्र चांगले आहे. धनकवडीचे माऊलीसेवा केंद्रही ठीक आहे. खराडी येथील अण्णासाहेब बेहेरे वृद्धाश्रमातही रुग्णशय्येला खिळलेल्या पेशंटसाठी पेशंट केअरची सोय आहे.

५. दीनानाथ मंगेशकर हॉस्पिटलला पेशंट्ससाठी डे केअर सुविधा आहे. परंतु ती रुग्णशय्येवर खिळलेल्या पेशंट्सच्या उपयोगाची नाही.

६. पेशंट वृद्ध वयात रुग्णशय्येवर खिळलेला असेल तर अनेकदा डिप्रेशनचा बळी ठरू शकतो. डिमेन्शिया, भास होणे, जुना काळ भूतकाळ व त्यातील घटना सध्याच घडत आहेत असे समजून वागणे व बोलणे हेही होऊ शकते. अशा वेळी वैद्यकीय सल्ल्याने उपाययोजना करावी. पेशंटला बोलून बरे वाटत असेल तर बोलू द्यावे.

शोभा१, त्या केंद्राचं नाव सुविधा नर्सिंग होम. ठीकठाक आहे, स्वच्छ आहे, वातावरण बरं आहे. प्रेमाने करणारा स्टाफ आहे. परंतु काही त्रुटीही आहेत. एकतर ते अंडरस्टाफ्ड आहे. एका शिफ्टला साधारण ८-९ पेशंट्सचे बघायला १ नर्स व २ आया असतात. पेशंट संख्या जास्त झाली तर मग गडबड होते. त्यात कोणा पेशंटची भरती होत असेल, कोणी अत्यवस्थ असेल वा निरोप / डिसचार्ज घेत असतील तरी हा स्टाफ त्या कामात बिझी राहातो व बाकी पेशंटची गैरसोय होते. पेशंटच्या रूम्स स्वच्छ व हवेशीर असल्या तरी एका रूममधे जेव्हा तीन-तीन पेशंट दाखल असतात तेव्हा ते गर्दीचे होते. डॉक्टर ऑन कॉल सुविधा उपलब्ध आहे परंतु ते डॉक्टर लगेच उपलब्ध होतील याची गॅरंटी नसते. राऊंड द क्लॉक व्यवस्थापक नाहीत. जे आहेत ते दिवसातून थोडा वेळ येऊन जातात. बाकी तिथे ऑक्सिजन, सलाईन वगैरे प्राथमिक सुविधा आहेत. आस्थेने करणारा स्टाफ आहे. ट्रीटमेंट होत नाही. फिजिओथेरपी उपलब्ध आहे. फिरायला मोकळी जागा, हिरवाई नाही. फ्लॅट्सचे रूपांतर नर्सिंग होमात केल्यामुळे येणाऱ्या मर्यादा आहेत. डेपोपासून जवळ असल्यामुळे सोयीचे आहे. स्टाफची संख्या व व्यवस्थापन सुधारण्यास तसेच देण्यात येणाऱ्या सेवेची गुणवत्ता सुधारण्यास भरपूर वाव आहे. तसेच येथे तुम्ही पेशंटसाठी प्रायवेट नर्स किंवा आया ठेवू शकत नाही.

चिनूक्स, तू मांडलेले मुद्दे एकदम बरोबर.