जिगीषा : मलाही कोतबो: अदिती

जिगीषा : मलाही कोतबो: अदिती

बरं झालं लोक्स मायबोलीने मला संधी दिली माझ्या मराठी प्रेक्षकांशी बोलायची , एरवी या सिरीयलवाल्यांनी मला नको जीव करून सोडलं आहे.आधीच मी नवीन . चार लोकांमध्ये तोंड वर काढलं की आधी कथानकाच्या थीमवरून सतरा प्रश्न , मग माझ्या आणि जयच्या पर्सनल लाईफवरून.

तुम्हीच सांगा, एवढी क्रांतीकारक थीम कोणाला सुचली होती का कधी ! आता आहेत माझ्या आगाऊ मैत्रिणी ज्या म्हणतात की बरं झालं कळलं की असं एक ऑफिस अस्तित्वात आहे जिथे लग्न झालेले employees सरळसरळ बाद आहेत ! म्हणजे ही लग्नसंस्थेसाठी चांगली बातमी नाहीच . अगदी अधिकृतरीत्या . एरवी आडून आडून अनेक हल्ले झालेत विवाहसंस्थेवर , पण हे अगदीच थेट आणि अति झालं ! बरं त्यातही समानता आहे , बाई आणि बुवा असे वेगवेगळे नियम नाहीत हे मस्तंय ! एक वात्रट मैत्रीण तर म्हणाली की स्ट्रेट आहे ना तुझा बॉस नक्की ? असे जगावेगळे नियम केले तर ऑफिस चालेल वेळ , मनुष्यजातीचं काय ?

आता आपल्याला काय कर्तव्य आहे मनुष्यजातीशी ? आपली सिरीयल चालली की बस्स ! आणि मला सांगितलं आहे इथल्या जुन्याजाणत्यानी की लोक काय वाट्टेल ते बघत बसतात. त्यांचा वेळ जात नसतो ना अगदीच . त्यांना प्रश्नही पडत नाहीत. जसं की माझी लग्नानंतरची ओळखपत्रं डॉक्युमेंटस वगैरे मिसेस अमुकतमुक म्हणून असतात , माझा पत्ता बदललेला असतो कागदोपत्री ,हे सगळं ऑफिसपासून कसं लपवलं मी नवीन नोकरी अविवाहित म्हणून धरताना ? की कुणी हे सगळं मागितलंच नाही ? सुटले म्हणा ! मी नाही ! स्क्रिप्टरायटर ! नाही तर इथे अस्मितासारखी सस्पेन्स स्टोरी सुरू नाही का होणार माझे रेकॉर्डस इतक्या तत्परतेने मी कसे बदलले त्या विषयावर ! बाकी तिच्या सस्पेन्स स्टोरीत तरी कुठे फारसा सस्पेन्स असतो म्हणा.

दुसऱ्या एका मावशींना वेगळाच प्रश्न पडलेला. लग्नच नाही ज्या ऑफिसात तिथे बऱ्यावाईट अफेअर्सना तरी काय स्कोप ! म्हणजे ‘’ आणि ते लग्न करून सुखाने किंवा दु:खाने नांदू लागले’’ ही सपक कथानकं जशी बाद झाली तशीच चटकदार विवाहबाह्य संबंधांचीही शक्यता नाही उरली! या बाईंना ऑफिस हे कामं करण्यासाठी असतं हे समजावून सांगायला गेलं तर म्हणतात , मग काय फक्त कामं करत बसलेली माणसं दाखवतात का सिरीयल्समध्ये !

गप्प बसायला काय घेतील हे सगळे ? या सर्व ढालगज लोकांना मी काय सांगू ? आहे एक चमत्कारिक बॉस, आहे एक अद्भुत ऑफिस ! नसतं का जगात असं काही ?बहुरत्ना वसुंधरा की काय म्हणतात ना ?
याहीवर वाद घालायला एक भांडखोर काका आहेतच - ते म्हणतात , असेल असेल जगाच्या पाठीवर असं ऑफिस ! पण मेल्यांनो तुम्ही दोघेही नवराबायको तिथेच का कडमडलात ? बाकीचं जग ओस पडलं होतं का ? हिंदी सिनेमाच्या वर ताण केलीत !

काय उत्तरं देत बसणार अशा असंतुष्ट आत्म्यांना ?
अरे बाबांनो ,जगा आणि जगू द्या- च्च आपलं बघा आणि बघू द्या बकवास शांतपणे इतरांना तरी!