किन्वा वापरून भेळ

नेहेमीची चुरमुरे वाली भेळ करतो तशी चुरमुर्यां ऐवजी किन्वा वापरून भेळ ..
किन्वा वापरून केलेला माझा सर्वात आवडता चटकदार पदार्थ !
(किन्वा माहित नाही त्यांच्यासाठी:
Quinoa grain : http://en.wikipedia.org/wiki/Quinoa
शिजलेला किन्वा आणि Health benefits बद्दल :
http://besthomechef.com.au/blog/how-to-cook-quinoa/)

लागणारा वेळ :
किन्वा शिजून रेडी असेल तर साधारण १५ मिनिटं .

साहित्यं:
मोकळा शिजवलेला किन्वा (कुठलेही मसाले किंवा भाज्या न घालता शिजवलेला, थंड झालेला.)
मिक्स करण्यासाठी:
फरसाण ( मी 'सूरती ' ब्रँड पंजाबी मिक्स फरसाण वापरलय , यु.एस मधल्या फरसाणा पैकी माझा आवडता फ्लेवर , बर्यापैकी तिखट असतो.)
चटण्या:
चिंच -खजुर भेळ चटणी.
वर्हाडी ठेचा किंवा कुठलाही लाल /हिरव्या मिर्चीचा ठेचा.
चिरलेल्या कच्च्या भाज्या बारीक चिरलेल्या :
कान्दा
टमॅटो
कैरी ( मिळाली नाही म्हणून मी स्किप केली.)
कोथिंबीर आणि पुदिन्याची पानं बारीक चिरून( पुदिन्याची चटणीही चालेल पण वर्हाडी ठेचा , फरसाण आणि २ चटण्या जरा जास्तं तिखट लागतात )
काकडी
शिजवलेली भाजी : उकडलेला बटाटा छोट्या फोडी .

सजवायला:
आलं (हे लांब चिरायचं बारीक सळई कट ) ,
डाळींबाचे दाणे
चाट मसाला/ जल्जिरा पावडर

कृति:
मोकळ्या शिजवलेल्या थंड ़झालेल्या किन्वा मधे सर्व भाज्या , चवीला आवडेल अशा प्रमाणात चटण्या , फरसाण मिक्स करायचं , serve करताना वरून डाळींबाचे दाणे , आल्याचे बारीक काप आणि चाट मसाला भुरभुरा आणि हादडा !

भाज्या आणि भेळेचा फोटो काढला , मोकळ्या किन्वाचा नाही काढला :).

अधिक टिप्स :
* भेळेत काही लोकांना इतक्या भाज्या आवडत नाहीत पण किन्वा मधे मात्रं स्किप करु नका , मोअर द मेरिअर !
* घरात रेडी असतील तर थोडे मोड आलेले मुग पण गार्निश करताना टाकु शकता !
* मी भेलपुरी करते तेंव्हा २-३ दही वडे कुस्करुन टाकते कालवताना आणि शेवपुरीच्या चपट्या पापड्याही टाकते , जर हे सगळं घरात असेल तर हे व्हेरीएशन ट्राय करा .

माहितीचा स्त्रोतः
माझी मैत्रीण , 'कांचन '.
तिच्या सॅलेड च्या रेसिपीवरून सुचलेलं भेळेचं व्हर्जन आणि मी केलेले बदल !
मुळ कृतित ती किन्वा शिजवताना ड्राय क्रॅनबेरीज टाकते , सॅलेडच्या भाज्यांबरोबर हिरवी चटणी , लिंबाचा रस टाकते .
(ती फरसाण -चिंच खजुराची चटणी , बटाटे-आलं , वर्हाडी ठेचा वगैरे टाकत नाही , सॅलेड स्टाइल ने करते बाकीच्या भाज्या घालून , ते व्हर्जन पण छान लागतं ).