ठरेन या जगात मी महान एकदा तरी

म्हणेन हो स्वत:सही लहान एकदा तरी
ठरेन या जगात मी महान एकदा तरी!...१

जळून जात कामना, पुन्हा न येत अंतरी
उरेल ना मनात या तहान एकदा तरी!...२

झिजेन चंदनापरी नुरेन रंचमात्रही
झिजून दावतो-झिजे सहाण-एकदा तरी!...३

असह्य येथ जाहले लबाड,भ्रष्ट लांडगे
चला तयांस मारुया वहाण एकदा तरी!...४

उरात गच्च संचिते पहा कितीक दाटती
घडो नितांत सौख्य ते प्रहाण एकदा तरी!...५
प्रहाण=नष्ट होणे

चुकेल कर्जभार हा असे प्रयत्न रोजचे
नसेल हे खरेदिखत गहाण एकदा तरी!...६

कळेल हे तुला प्रिये, 'जगात दु:ख थोरले'
उरेल भावरम्यता "अहा!" न एकदा तरी !!...७

रामकुमार