सिरसाट

// या धुंद चांदण्यात... //
'' या धुंद चांदण्यात
रात रंगवून गेली;
चंद्रवेड्या मनाला
गूज सांगून गेली...

मन पाखरू फिरे
बागेत चांदण्यांच्या;
प्रत्येक दीपकळी
मात्र टाळून गेली...

स्वप्नात दंग मन
किती जागवू मनाला;
आगळी एक धुंदी
रात्र शिंपून गेली...

अंथरू कशा आता
चांदण्या तुझ्या पायी;
तारका पेंगुळल्या
निशा संपून गेली...! ''

- विजय सिरसाट
मो. ८६९८३५०९३३

'' मनाची घालमेल
भावनांची वादळं
आसवांचे पूर
सखे...
विसरलो नाही अजूनही
तुझ्या त्या शेवटच्या पत्रातला
ओला मजकूर!

' माझं लग्न ठरलंय...! '
कुठलीही आळीबिळी न देता
स्पष्टपणे लिहिलेलं
तुझं ते वाक्य
घुसलं सरळ छातीत
धनुष्यातून सुटलेल्या बाणासारखं;
अन
ध्वस्त झालं
माझं आयुष्य
पत्त्यांच्या मकानासारखं
क्षणात!!! ''

- शीलवंत सिरसाट
मु. वाघजाळी
मो. ९३२६७५५२७५