वादात या कुणीही

वादात या कुणीही वर हा हझलचा प्रयत्न..!

वादात या कुणीही सहसा पडू नये
भावास मैत्रिणीच्या कधिही भिडू नये

देती न लक्ष कोणी, बागेकडे कधी
खुडतात फूल दिसता पाटी 'खुडू नये'

आहेर जेथ नाही, तेथे अवश्य जा
सुग्रास बेत असता का हादडू नये ?

महिना द्वितीय होता, चौदा दिनांकही
राखी समोर येता, मी गडबडू नये ?

नशिबात टायटॅनिक अन् रोझही हवी
तेव्हाच सार्थ बुडणे, अथवा बुडू नये

फ़सव्याच जाहिराती, मी सर्व जाणतो
फुकटात कार्ड मिळता का खरवडू नये ?

तांदूळ मी न धुतला, होईल फ्लर्टही,
नवरा न रागवावा तूही चिडू नये

वादात या कुणीही सहसा पडू नये
दुरुनी सुगंध घ्यावा कलिका खुडू नये

जपते किती उराशी घरटे तुला मला
फुटताच पंख पण का आम्ही उडू नये ?

आयुष्यभर झगडलो अडलो पदोपदी
माझ्याविना कुठेही दुनिया अडू नये

डोळ्यांतली सुरा ही प्राशून धुंद मी
कुठलाच नाद आता मजला जडू नये

तू घातली न केव्हा फुंकर कधी कुणा
धरली अताच खपली तू खरवडू नये

मोक्षाहुनी जिण्याची भलतीच ओढ ही
कोडे मलाच माझे, का उलगडू नये ?

-- अभिजीत दाते