शब्दराशी

ती

अचपळ वारा धरु पहाता
हातास काही लागत नाही
गंध जरासा किंचित ओला
आत कुठेसा थबकून जाई

अथांग सागर अफाट पाणी
दिपवी त्याची दिव्य भव्यता
आत आत मी सुखावतो की
ओंजळ इवली भरता भरता

निळेनिळेसे अंबर डोई
नजर न काही तेथ ठरावी
दर्पणातुनी येत हाताशी
तुकडा तो तर जपून ठेवी

ओलांडुनिया शब्दराशींना
अमर्याद ती सदैव नूतन
प्रतिबिंबित ती शब्दामधुनी
धन्य धन्य ते सार्थ सुदर्शन

----------------------------------------------
अचपळ.... अति चपळ

अंबर.... आकाश