मारीकोन्दो

मारी कोन्दोबद्दल पहिल्यांदा कुठेतरी वाचलं होतं आणि नंतर तिची ती नेटफ्लीक्सवरची प्रसिद्ध सिरीज बघितली होती ज्यात ती अमेरिकतल्या हर प्रकारच्या पसार्‍यांनी ओथंबलेल्या खोल्या आवरण्यात मदत करायची. नंतर तिची 'कपड्यांना कश्या घड्या घालाव्यात' याबद्दलची एक क्लीप बघितली. 'हॅ! यात एवढं काय्ये शिकवण्यासारखं?' असं वाटलंच, खोटं कशाला बोला! तर ते प्रकरण तितपतच राहिलं. नंतर कंटाळा आला बघायचा. समहाऊ पसारा म्हणण्याइतक्या, वर्षानुवर्षे पडून राहिलेल्या चीजवस्तू माझ्याकडे नसतील म्हणूनही असेल, पण तिची परत काही कुठल्याच माध्यमात भेट झाली नाही एवढं मात्र खरं.