पुन्हा नव्याने

वाटे पुन्हा नव्याने ,जगणे तरुण व्हावे
श्वासात कोंडलेले, दुखणे विरून जावे

भेगाळल्या मनाच्या, गाभ्यात लोपलेल्या
ओसंडत्या ऋतुंनी, बेभान रूप घ्यावे

ही जिंदगी नसावी, लाचार दीनवाणी
सोडून भीड सारी, स्वप्नील पंख ल्यावे

आतुर भावनांच्या, वाटा खुणावतील
पाऊल सावरूनी, चुकवून पार व्हावे

स्पर्शात ऊब सारी, डोळ्यात प्रेम पान्हा
द्यावे कधी मनाला, मौनास अर्थ यावे

वृत -आनंद कंद
(गा गा ल गा ल गा गा × 2)