कोणता चक्रम इथे

गझल -

का, कसे, केव्हा, कुणी हे आजही संभ्रम इथे
विश्व गेला थाटुनी हे, कोणता चक्रम इथे

झाड होण्याचे बघावे स्वप्न आयुष्या कधी
चांगला माणूस होतानाच लागे दम इथे

घेतली की अंतरे मिटतात आपोआप ही
ती कुठेही का असेना, घाल थोडी रम इथे

मानला कामात मी आनंद जेव्हापासुनी
तेवढा आराम केला जेवढे मी श्रम इथे

ह्यापुढे देऊ नको त्यांना मनाचे स्टेज तू
रोज कोणाचे न कोणाचे अरंगेत्रम इथे

नाहिली आहेस ना नुकतीच पूर्वीसारखी
की उगा चिडवायला आली तुझी घमघम इथे