कापूर जीवनाचा करण्यात अर्थ नाही

कापूर जीवनाचा करण्यात अर्थ नाही
जाळून ह्या जिवाला जगण्यात अर्थ नाही

पाऊस पाड आता ज्याच्यात स्वत्त्व लोपे
भुरट्या सरींमधे ह्या भिजण्यात अर्थ नाही

नाते जपायची घे तूही जबाबदारी
कोणी नसेल तेव्हा फुलण्यात अर्थ नाही

वाहून जात आहे जीवन क्षणाक्षणाने
आता तुझा किनारा धरण्यात अर्थ नाही

हे वाहिल्यामुळे तर मन लख्ख लख्ख होते
हे 'बेफिकीर' अश्रू पुसण्यात अर्थ नाही

-'बेफिकीर'!