साहेबराव

साहेबराव मनात रुतला तो रुतलाच! आजदिनी बरोब्बर तीस वर्षे झाली साहेब्याला पाहून! पण अजून मनातून जात नाही तो!

कर्वेरोडवर नळस्टॉपला एक चहाचे हॉटेल आहे. हे एक असे हॉटेल आहे जे पहाटे तीनला उघडते आणि रात्री साडे आठला बंद होते. पहाटे तेथे पेपरवाले आणि 'अभ्यासासाठी किंवा सबमिशनसाठी' नाईट मारणारे विद्यार्थी ह्यांची तुंबळ गर्दी असते. ह्या हॉटेलचे सर्वेसर्वा अप्पा हे आता साठीच्या पुढचे आहेत. त्यांची चारही मुले ह्या हॉटेलात राब राब राबली आणि अजूनही राबतात. इंजिनियरिंगला असलेल्यांसाठी विशेषतः हे हॉटेल म्हणजे सबकुछ असायचे, अजूनही असते.