शेक्सपीअर

विल्यम शेक्सपीअर! आजपासून बरोब्बर ४०० वर्षांपूर्वी, २३ एप्रिल १६१६ रोजी स्ट्रॅटफर्ड-अपॉन-एव्हन गावी ह्या अवलियाने अखेरचा श्वास घेतला आणि त्या एव्हन नदीला आणि त्या चिमुकल्या गावाला जगाच्या नकाशावर अजरामर करून सोडले. इंग्लिशचा हा कविकुलगुरू. त्याच्या साहित्यिक मूल्यांविषयी लिहीण्याची माझी प्रज्ञा नाही, आणि त्याच्या चरित्राविषयी लिहीण्याचा माझा अभ्यास नाही. त्यामुळे त्याच्याबद्दल लिहील्या गेलेल्या अमाप लेखांमध्ये माझीही एक भर म्हणून गेल्या वर्षी पाहिलेल्या 'किंग लीअर' ह्या त्याच्या नाटकाच्या प्रयोगाबद्दल लिहायची इच्छा झाली.

"रुनम्या तुझ्या नावाचा अर्थ काय रे?" ...... प्लीज, आणि नावात काय आहे बोलू नकोस.

"तुला कसे समजले, मी हेच बोलणार होतो ते?" , अचंबित होत मी उद्गारलो.

"तुझी विनोदबुद्धी तेवढीच आहे रे .." मुस्काटात मारल्यासारखा तो उत्तरला आणि शेजारच्या दोन पोरी फिदीफिदी हसू लागल्या.

आता त्या मित्राच्या मताशी सहमती दर्शवायला हसल्या, की हसल्यावर आपण सुंदर दिसतो या गैरसमजातून हसल्या, कळायला मार्ग नाही. पण माझ्यावर काही विनोद घडला की गरजेपेक्षा जास्त हसण्याची फॅशनच आलीय सध्या आमच्या ऑफिसमध्ये.