आयोजन

एकदा महिला मंडळातल्या एका मैत्रिणीचा फोन आला ,”अगं आपल्या त्या ’—’ चे मिस्टर गेले गं! झाले आहेत आठ दहा दिवस, उशिराच कळले आहे, भेटून येऊ या! जमेल कां आज दुपारी?” मी ’हो’म्हटले. बातमी अचानकच आलेली आणि ही मैत्रीण हवीहवीशी लाडकीच सगळ्यांची! गोरी, घारी,ठसठशीत नाकडोळ्यांची , म्हणजे नवरात्रात अष्टमीला तांदुळाचा मुखवटा करतात नां देवीचा ,अगदी त्याच्यासारख्या चेहेऱ्याची! सतत हसतमुख , प्रसन्नवदना, उत्तम गाणारी, आणि जेव्हा भेटेल तेव्हा कधीही कुणाशी मागचे हिशेब न काढता सद्यस्थितीला धरून बोलणारी, वागणारी! विचारपूस करणारी!