माझा इथे कुणीही शत्रू न मित्र आहे

माझा इथे कुणीही शत्रू न मित्र आहे
काही म्हणा खुळ्यांनो पण मी पवित्र आहे

दुखवून आपल्यांना परक्यास हास्य देतो
जितके जमेल तितके बनतो विचित्र आहे

मारू कसा तुझ्याशी मी दिलखुलास गप्पा
नाहीस तू समोरी नुसतेच चित्र आहे

मदिरा खराब आहे हे सांगता कुणाला
कोणी मला विचारा उर्जाजनित्र आहे

भूषण तयार असता, झाला कशास त्याला
मकरंद कर्करोगी...... असुदेत...... मित्र आहे

-'बेफिकीर'!