आहे पण अन् नाही पण ..!

जरा तुझ्याशी भांडायाचे आहे पण अन् नाही पण
जरा स्वत:शी बोलायाचे आहे पण अन् नाही पण

कुणी ऐकतो मख्खपणे अन् कुणी चघळतो अफवाही  
मनातले सल सांगायाचे आहे पण अन् नाही पण

किती ऐकले पोक्त इशारे, टोले, सल्ले प्रेमाचे
फक्त स्वत:चे ऐकायाचे आहे पण अन् नाही पण

करायचे ते केले नाही दिवसा स्वप्ने बहुरंगी
मारुन-मुटकुन सजवायाचे आहे पण अन् नाही पण

जादूच्या ह्या मंचापुढती तर्काचे हे सोंग फुके
जरा-जरासे लपवायाचे आहे पण अन् नाही पण

भाळावरच्या रेषांबद्दल धन्यवाद अन् गार्‍हाणे
आपण अपुले रेखायाचे आहे पण अन् नाही पण

- मंदार.

[ बेफिकीरजींच्या सूचनां नंतर जे बदल केले ते वर आहेत. आता प्रत्येक ओळीत ३० मात्रा आहेत. शिवाय अलामत काही ठिकाणी चुकली होती त्याची दुरुस्ती केली आहे. मूळ जे लिहिलं होतं ते खाली तसंच ठेवत आहे.

धन्यवाद, बेफिकीरजी! ]

जरा तुझ्याशी भांडायाचे आहे पण नि नाही पण
जरा स्वत:शी जुळवायाचे आहे पण नि नाही पण

कुणी ऐकतो मख्खपणे अन् कुणी चघळतो नुस्त्या अफवा
मनातले सल सांगायाचे आहे पण नि नाही पण

किती ऐकले पोक्त इशारे, उगाच टोले, प्रेमळ सल्ले
फक्त स्वत:चे ऐकायाचे आहे पण नि नाही पण

करायचे ते केले नाही दिवसा स्वप्ने नुसता धुरळा
मारुन-मुटकुन जगावयाचे आहे पण नि नाही पण

जादूच्या ह्या मंचापुढती तर्काचे हे सोंग कशाला
जरा-जरासे फसावयाचे आहे पण नि नाही पण

भाळावरच्या रेषांबद्दल गार्‍हाणे अन् धन्यवादही
आपण अपुले लिहावयाचे आहे पण नि नाही पण

- मंदार.