कथाशंभरी -एक ही भूल - निल्सन

बर्‍याच दिवसांनी दोघींना मोकळा वेळ मिळाला होता. नाही म्हटले तरी काही वर्षे लोटली होती. पुलाखालून बरेच पाणी वाहून गेले होते. अचानक एकीचे लक्ष तिकडे गेले. "अरे हे काय आज बिछडे यार भेटण्याचा योग आहे वाटतं" ती दुसरीला बघत म्हणाली.
म्हणजे? दुसरीने विचारले.
"अगं तो बघ ना तिकडे. खरंतर तुला आता सांगायला हरकत नाही. आपल्या farewell पार्टीच्यावेळी तो आणि मी गपचूप पार्टीमधून बाहेर सटकलो होतो आणि संपूर्ण रात्र आम्ही दोघे एकत्र होतो." तिने डोळे मिचकावत सांगितले.
साला, त्यानंतर तो पुन्हा भेटलाच नाही. कुठे असतो काय माहित? अरे कुणालातरी शोधतोय वाटतं तो इथे?
"हो मलाच" दुसरी थंडपणे उत्तरली. "माझा नवरा आहे तो"