मला आवडलेले पुस्तक - भाग १ - पोखिला

मला आवडलेले पुस्तक - भाग १ - पोखिला

पोखिला - अपहरणाचे ८१ दिवस

लेखक - डॉ . विलास बर्डेकर

नावापासूनच हे पुस्तक आपल्या मनाची पकड घ्यायला लागते . डॉ . विलास बर्डेकर यांच्या जीवनात
घडलेल्या त्या चित्त थरारक ८१ दिवसांची ही अनुभव मालिका .

फुलपाखरांच्या शोधात अरुणाचल प्रदेशाच्या जंगलात गेलेल्या या संशोधकाला बोडो दहशतवादी,
पत्रकार समजून चुकून पकडतात . त्यांचे अपहरण करतात . आणि तब्बल ८१ दिवस डॉ विलास यांना
या दहशत वाद्यांच्या ताब्यात राहावे लागते .

तेव्हाचे सर्व अनुभव अतिशय ओघवत्या भाषेत त्यांनी या पुस्तकात मांडले आहेत . जरी त्यांना तिथे ओलिस
म्हणून राहावे लागले तरीही ते बोडो लोक कधीही त्यांच्याशी माणुसकी सोडून वागले नाहीत .

स्वतः लेखकही बाणेदार , आत्मसन्मान जपतच तिथे राहिले . उलट त्याच लोकांना काहीतरी चांगल्या गोष्टी
शिकवत राहिले . तिथल्या दहशतवाद्यानाही त्यांनी समजून घेतले . सपन , देबू , नारायण हे दहशतवादी तर
त्यांना अंकल म्हणूनच हाक मारत व आदराने त्यांच्याकडे पाहत . पप्पू आणि शंकर नावाचे दोघे जण हे ही
त्याच्याबरोबर स्थानिक ओलिस होते . यातल्या पप्पू वर तर लेखकाने मुलासारखे प्रेम केले.

ही सर्वच २० , २५ वयाची तरुण मंडळी होती . गरीबी व ब्रेनवाश मुळे अशा मार्गाला लागलेली होती .
पण आता परतीचे दोर कापले गेल्याने त्यांना हेच करणे भाग होते . एवढे असूनही लेखकाने किंवा त्या दहशतवादी
तरुणांनी कोणीच आपली माणुसकी सोडली नाही . हे मला यातले खूप विशेष वाटले .

पोखिला म्हणजे असामी भाषेत फुलपाखरू . ह्या एवढ्या भयानक प्रसंगातही लेखकाने आपले फुलपाखरांवरचे
संशोधन चालूच ठेवले होते आणि गंमत म्हणजे ही तरुण पोरेही या कामात त्यांना छान सहकार्य देत होती . जणू काही
कुठल्या संशोधनाच्या मोहिमेवर आल्यासारखेच त्यांनी हे दिवस हिमतीने व सकारात्मक दृष्टीने व्यतीत केले .
त्यांच्यावरही काही भयानक प्रसंग ओढवले पण त्यांनी आपल्या चांगल्या वर्तणुकीने त्या सर्वावर मात केली .
आणि ही त्यांची सकारात्मकता खरेच शिकण्यासारखी आहे .