...पाकीट मारूया चला

चकमकी मध्ये जरासा प्राण फुंकूया चला
दुश्मनाला... जिंकण्याचे मर्म सांगूया चला

कोठुनी खेटायला येती मनाला हे ऋतू
बहरते इच्छा कशी शोधून काढूया चला

या इथे आहोत आलो तर चला जाऊ तिथे
आपल्यालाही जरा भेटून घेवूया .. चला...

झिंगते चित्तामधे मदिरा जिच्या बघण्यामुळे
आज ती गुत्त्यातली साकीच प्राशूया चला

औषधालाही कुठे मिळतात आताशा सुखे
एक विसरायास दुसरे दु:ख लावूया चला

रोज उशिरा पोचतो आपण तशी चिडतेच ती
जाउया लवकर तिला लाडात आणूया चला

जायचे असते कुठे माहीत आहे का तुला
जो पुढे भेटेल त्याला हे विचारूया चला

बायबल गीता कुराणातील ओळी संपल्या
अर्थ लावायास हे अस्तित्व चाळूया चला

विठ्ठलाच्या दर्शनाला केवढ्या गर्दीमधे ;
थांबली माणूसकी ...पाकीट मारूया चला