सांताक्लॉजा (स्फुट )

सांताक्लॉजा
========

"आई, आज नक्की येईल ना गं तो ?"
"अरे बेटु, आई काम करतेय "
"सांग ना गं .."
" कोण येईल ?"
" तू म्हणालेलीस तो "
" ते बघ आता.. कसं समजायचं मी ?"
" तू सांगितलेलं ना एकदा? तो येतो म्हणून..मी लहान असताना ?"
" मग आत्ता मोठा झालास का ?"
" हो मी मोठा झालोय"
" हो ना माझा बेटुराजा.. चार वर्षांचं मोठ्ठं बाळ ते "
" अगं मी खरंच मोठ्ठा झालोय.. बाबा एव्हढा "
" हम्म "
"आई ! आई.. ओ दे ना "
,
,
,
,
,
,
,
,
,

"चला सगळे जेवायला. माझी क्युट गर्ल कुठेय?"
"भूक नाही "
" हे काय ! अगं काय पोरगी आहेस तू.. सकाळी अर्धी पोळी खाल्लेलीस. डबा पण जसाच्या तसा परत आणलास "
" नको ना गं.. भूक नाही म्हटलं ना !"
" मी मार देईन हं अशाने. मी काय काय करायचं गं ? तुमचं आवरा, डबे करा, नाश्ता बघा, ऑफीस, धावपळ आणि तू असं केलंस तर आईचं लक्ष राहील का कामात ?"
" ऊं.. आई झोपायचंय गं. "
" काय बोलणार ! माझं कोण ऐकणार.. "
" आई ! आज रात्री डेट बदलणार ना ?"
" हो ! का गं ?"
" म्हणजे आजच ख्रिसमस ?"
" हो "
" यिप्पी SSSSS !!"
" काय झालं ?"
" उशीखाली गिफ्ट मिळणार ना सकाळी... !!"
" आई काय झालं ? दीदी काय म्हणतेय ?"
" या ! तुमचीच कमी होती "
" सांग ना आई !"
" अरे आज सांताक्लॉजा येणार आहे "
" ये SSSSS....यिप्पी SSSS .. आई आई.. मी सकाळी म्हणत होतो ना एकदा .. तर तू ऐकत नव्हतीस "
" ओ रे माझ्या राजा शोना.. शॉरी "
" आई ! ते बघ.. तू नेहमी त्यालाच असंच लाडाने बोलतेस. मला नाही ना बोलत ?"
" अगं तू पण माझी परीराणी आहेस. तू तर माझ्याकडे त्याच्याआधी आलीस. तुझा तर खूSSप लाड झालाय "
" तुम्ही बसा हं मुलांनो. दंगा करू नका. मी आलेच दुकानात जाऊन "
,
,
,
,
,
,

" आई ! गुड नाईट "
" गुड नाईट बेटु "
" आज येणार ना सांताक्लॉजा ?"
" का नाही येणार ? माझ्या राजाबेटुसाठी नक्की येणार "
" हं"
" दीदी झोपली वाटतं "
" आई सांताक्लॉजा बाबा असतो ?"
" नाही. सांताक्लॉजा तर लांब चंद्रावर राहतो. तो चंद्राच्या किरणांच्या गाडीवर बसून येतो आणि सगळ्या मुलांना गिफ्टस देतो "
" सगळ्या मुलांना ?"
" हो "
" अगं पण तो आपला असतो ना ?"
" नाही, सर्वांचा असतो. झोप बरं. गडबड करणा-या शैतान मुलांना नाही देत गिफ्ट"
" आई मी शैतान आहे ?"
" नाही रे शोना ! तू तर राजा बेटा आहेस. गुड बॊय !"
" मग सांताक्लॉजा येईल आपल्याकडे ?"
" अरे हो हो हो ! येईल. किती प्रश्न विचारतोस सारखा !"

" आई पण तो बाबा असतो ना ?"
" नाही म्हटलं ना ? झोप आता ! "
" रागवू नकोस ना आई ! नाहीतर सांताक्लॉजा तुला शिक्षा करेल "
" गुड नाईट ! झोप आता नाहीतर सांताक्लॉजा येणार नाही तू जागा असल्यावर "
,
,
,
,
,
,
,
,
,
,
" गुड मॉर्निंग चिल्ड्रेन ! मेरी ख्रिसमस !!"
" सकाळ झाली ?"
" हो ! सकाळ झाली. दीदीला उठवा. आजसे ख्रिसमस कि छुट्टी है "
" ये SSSSSSSS "
" दीदी पण उठली बघ ! मेरी ख्रिसमस !! "
" आई ! माझं गिफ्ट ?"
" मला नाही माहिती. बघ बरं उशीखाली ?"
" यिप्पी SSS ! हे माझं गिफ्ट "
" आई सांग ना त्याला. माझं गिफ्ट घेतलं त्याने "
" बेटु, तुझ्या उशीखाली पण असेल ना. बघ बरं "
" सांताक्लॉजा आलेला ?"
" मला पण नाही माहीत. मी तर झोपले होते. "
" मग माझं गिफ्ट ?"
" थांब हं. बघू बरं या उशीखाली... व्वाव ! हे बघ "
" यिप्पी !! माझं गिफ्ट !!"
" आई ! काय गं.. फक्त चॉकलेट ?"
" अगं ! तसं नसतं म्हणायचं.. सांताक्लॉजा जे देईल ते घ्यायचं असतं बेटा "
" उं जा ! "
" दीदी.. दीदी ! तसं नसतं म्हणायचं. सांताक्लॉजा जे देईल ते घ्यायचं असतं "
" ए जा तू तिकडं "
" अगं हो ! सांताक्लॉजा जे देईल ते घ्यायचं असतं .. सांताक्लॉजा बाबा असतो !"
" हे काय बेटु. कितीदा सांगितलं तसं म्हणायचं नाही "
" दीदीच म्हणत होती. सांताक्लॉजा बाबा असतो ते "
" मी कट्टी आई ! "
" असं काय गं ! मी काय करू आता सांग बरं "
" मला माहीत आहे सगळं "
" काय ? "
" बाबा इथं असता तर किती छान छान गिफ्ट मिळाल्या असत्या. मला बार्बी डॉल. शोनुला गाडी "
" आई ! सांताक्लॉजाने एकदा दिलेली गाडी कुठंय माझी ?"
" ती कधीच मोडली "
" मग आता दुसरी द्यायची ना त्याने "
" शोनु ! आई खोटं बोलतेय रे. आईच ठेवते गिफ्ट उशीखाली. हो ना आई ?"
" नाही रे सोनु..."
" मग सांताक्लॉजाने चांगले गिफ्टस का नाही दिले ?"
" अरे ! मी तरी काय सांगणार ? त्याने गाडीतून येता येता उशीखाली टाकले असतील गिफ्टस "
"पण बाबा असतानाच कसा चांगले चांगले गिफ्ट द्यायचा सांताक्लॉजा ?"
" खूप बोलतेहेस हं तू हल्ली !!"
" हो मग ! आताच का फक्त चॉकलेटस ?"
" दीदी... माझी परीक्षा नको पाहूस . "
" जा ! तू नेहमी मलाच असं बोलतेस "
,
,
,
" रडू नको दीदी ! आपण बाबाला नाव सांगू आईचं ! आई सांताक्लॉजा आपल्या बाबाला का नाही घेऊन येत ? तो पण तिथेच असतो ना ?"
".............................................."
" आई आई सांग ना.. मला त्याची खूप आठवण येते. तू बाबाला बोलव "
" शोनु..............................."
" मला बाबा पाहीजे.. आत्ताच्या आत्ता बाबा पाहीजे. मला चॉकलेट नको "
"............................................................
...............................................................
............................................................... "

" शोनु ! काय केलंस ? आईला रडवलंस ना ? "
" मला बाबा पाहीजे "
"अरे ! आपला बाबा तर खेळणी वाटायला गेलाय मुलांना "
" म्हणजे सांताक्लॉजा ??"
" हो ! त्याला खूप काम आहे. सगळी मुलं त्याची वाट बघतात "
" मग आपल्याला का नाही भेटला तो ? "
" आपण झोपलो होतो "
" सगळे ?"
" हो !! "
"आपण झोपलो होतो तेव्हां बाबा आलेला ?"
" हो "
" मग बाबाने गाडी का नाही दिली मला ?"
" अरे त्याच्या लक्षात नाही राहीलं. त्याला वाटलं तू अजून चॉकलेटच खातोस.."
" आई ! बाबाला सांग ना परत चंद्रावर जाऊ नकोस म्हणून.. मला त्याच्याशी खूप खेळायचंय !!"
,
,
,
,

" आई ! सॉरी गं ... माझ्यामुळे रडलीस ना ?"
"नाही गं राणि !! माय स्वीट गर्ल "
" मी जर तसं नसते म्हटले तर शोनुने बाबाचा हट्ट केला नसता आणि तुला रडायला नसतं आलं "
" जा.. बाथरूममधे जा सगळे. मी आवरते सगळं "
" आई !! तू आता रडणार आहेस का एकटी ?"

" जा गं प्लीज ! वैताग आणलाय नुस्ता .....!!!
जा दोघंही. इथून जा.
मला आता खरंच एकटीला सोडा..
प्लीज जा !!
मला ना आता ...
माझ्या सांताक्लॉजाजवळ रडायचंय..
माझं गिफ्ट नाही आणलंस म्हणून...!
,
,
मला एकटीला सोडा प्लीज.. पाच मिनिटासाठी ..!!!"

- Kiran