असा मला एक भुताचा चित्रपट काढायचाय...

हो. असा मला एक भुताचा चित्रपट काढायचाय.

कारण.... बरीच वर्षं झाली आता, रामसे बंधु रिटायर झालेत... नवा पिक्चर काढतच नाहीयेत... म्हणजे एखादा "शैतान का ... ", नाहीतर "खुनी ... " किंवा "प्यासी ... "? काहीच नाही तर नुसतंच "आ~"? अमिताभच्या "पा~" सारखं?

बर चित्रपट सोडा. एखादा "झी हॉरर शो" तरी बघितला असता? तिथं तर दर आठवड्याला नवं भुत, त्याचं नवं "भुतडं"! "भुताचं रुप म्हणजे भुतडं" असं म्हणता येईल का हो?? त्यातुन त्यांना (म्हणजे आदरणिय रामसे बंधुंना) बरी गोष्ट मिळाली तर मग दोन भाग! फुल्ल भारी! या आठवड्यात भुत बघायला गेलं, की "आयला! याला कुठं तरी पाहिलंय... थांब आठवतो... सांगु नकोस. आठवेल .. हां! "मास्तर.." नाही.. "पी एम"... नाही.. " "आयला, हे तर आपलं लास्ट वीकचं भुत!" पण आजकाल "झीवर हॉरर शो" ही नशिबात नाही. तिथं "झीटीव्ही"वर "मिल्या" फेम "काय रे देवा सारेगमप" चालु असतं. आता "आपल्या पल्लवी" ला कोणी "म्हातारी" म्हटलं असतं तर त्याचा खुन प्यायला मी भाड्यानं भुतं पाठवली असती, पण तिचे ते ड्रेसेस हॉरर आहेत असं कोणी म्हटलं मात्र मोदकच पाठवीन...

बाकी मग "सागर बंधु"ही सुट्टीवर गेलेत... त्यांचा "हॉरर शो" नसला, तरी "भुतंखेतं" होतीच की त्यांच्या राज्यात. म्हणजे आपली "अलिफ़ लैला!"
"अलिफ लैला", "अलिफ लैला", "अलिफ लै ए ए ए ए ला"
एका एका एपिसोड मधे पन्नास पन्नास राक्षस. त्यांच्या राक्षशीणी. (इथं एकास एक प्रमाण नव्हतं बहुतेक... )
तर ते राक्षस! त्यांच्या मोठ्या मोठ्या भिवया. काळे कुरळे वीग आणि सुटलेली पोटं. राक्षसांची जीन्स कुठली बघायला हवं पण. नाहीतर सगळ्या राक्षसांचे केस काळेच कसे असतात? आणि एकदम घनदाट वगैरे... खुद्द सिंदबाद काय कमी हॉरर होता??

भुतंच हवी तर मग थोडंसं "ब्योमकेश बाबु" चं "ब्योमकेश बक्षी" बघितलं असतं. त्यातही मधुन मधुन भुतं असत. पण ते तर बंदच पडलंय... हाट.

काल रात्री घरी आलो, आणि युट्युब बघितलं. तिथं बरेच दिवसांपुर्वी त्यावर एक चित्रपट पाहिला होता.. "फ्रँकेन्स्टाईन्स कॅसल ऑफ फ्रीक्स"! रामसे बंधुंनी कुठुन प्रेरणा घेतली असावी याचा अंदाज आला. पण तो चित्रपट पाहिल्यापासुन एकुणच आपल्या भारतिय भुतांची फारच आठवण येत होती. पण पर्याय नव्हता. वरचं सगळं आठवलं आणि गदगदुन, भरभरुन आलं.

म्हणुन मग मला वाटु लागलंय. मनात आलंय. आणि असा मला एक भुताचा चित्रपट काढायचाय.
नाव सुचवा : -
१. राखी की हवेली.
२. राखी इन भुतांची फॅक्टरी. ( हो. मराठी मधे. कक्षा रुंदावुया की इथेही. आणि आपली राखी शेवटी मराठीच आहे ना. (कशीही असली तरी असं मी अजिबात म्हटलं नाही! ) ) आणि
३. "रा~" (बरोबर. पा~ सारखं.)
* हाट. "राखी का स्वयंवर" आधीच गेलं

बरोब्बर. आपली हिरॉईन फिक्स आहे. मराठी, हिंदी आणि इंग्रजी. तिनही भाषेत चित्रपट बनवायचाय. या तिनही भाषा अस्खलित येणारी, सुंदर, केवळ भुमिकेच्या गरजेपोटी "अं" प्रदर्शन करणारी, छान डांस करणारी एखादी हिरॉईन हवी होती. आपली राखीच काय वाईट आहे? म्हणुन ती फिक्स आहे.
तिची धाकटी. बर मोठी. मोठी बहिण म्हणुन "आपल्या पल्लवी" ला घेऊ. पण केवळ ती सारेगमप मधील वार्डरोब मधे येणार असेल तरच! आणि एक हिरो हवा आहे. सापडेल.... हिरोचं काही महत्त्व नसतं हॉरर चित्रपटात...

आणि हां... लोकेशन उटीमधे. ती जागा "सावन कुमारनं" सोडली म्हणतात. तर तिथं एखादी हवेली शोधीन म्हणतो. हवेलीत लाईट्स नसावेत. सगळीकडे झुंबरं मात्र हवीत. आणि मेलेल्या वाघांचे "आ~" केलेले ... "काय म्हणतात त्याला??" टेबल क्लॉथ? तर ते वाघाचे टेबल क्लॉथ.. आणि ढाली-तलवारी हव्यात. मग एक? नाही ३. ३डॉबरमॅन कुत्रे. हवेलीत एखादा कुबड असलेला, कंदिल घेतलेला नोकर घ्यायचाय. त्याची मुख्य भुमिका आहे, राखीनंतर. तोच तिला घाबरवणार आहे. कॉमेडियन्स लागतील ४-५. त्याशिवाय रिलीफ कसा मिळणार! बाकी म्युझिक बॉप्पीदा. डान्स डायरेक्टर "सुबल सरकार". गायक चालेल कोणीही.

आणि हां! एक पाद्री हवाय... अन्नु कपुर काय करतो हल्ली? मराठी येतं त्याला. सचिन-लक्षा-अशोक सराफच्या चित्रपटात होता कुठेतरी. आपल्या चित्रपटात पहिला बळी त्याचाच! कुबड्या नोकर मात्र मरणार नाही. पुढे..... पुढे..... पुढे काही सुचत नाहीये हो... पण सुचेल. काही सुचलं नाही तर "भुमिकेच्या गरजेपोटी" राखीची दोनचार गाणी टाकु. भिती वाटवायला "पल्लवीला" अजुन दोनचार ड्रेस बदलायला लावु. अगदीच काही नाही, तर एखादा नवा हॉलिवूड चित्रपट पाहु.

आणि हो. विसरलोच होतो. मुख्य भुमिका भुताची! तुमच्या आजुबाजुला कोणी होतकरु भुतं असतील, तर माझ्या विपु मधे डोकवायला सांगा. "दिवसा"च. हो. हो. दुसरं योग्य भुत मिळालं नाही, तर मीच भुत होईन म्हणतो. मीही परफेक्शनीस्ट आहे. बाकी, भुतांसाठी "रा बंदु आणि सा बंधु"शीही संपर्क साधला आहे. त्यांचं उत्तर आलं, की लग्गेच डिटेल स्टोरी लिहायला घेणार आहे. स्टोरीचं होईल काहीतरी, पण तुर्तास सांगणे इतकेच, की ह्या लाईन वरती असा मला एक भुताचा चित्रपट काढायचाय...