||श्री गणेशा||

रंगबेरंगीची सुरुवात कशी करावी हेच कळत नव्हते.. पण गणपती उत्सव सुरु झाला आणि म्हटले ह्या कलेच्या देवतेच्या विविध रंगी विविध ढंगी प्रकाश चित्रांनी ही सुरुवात करावी...

पुण्यात गणेशोत्सव म्हणजे लोकांचा महापूर असतो. गावोगावची मंडळी दर वर्षी हा उत्सव बघण्यासाठी येतात... गौरी विसर्जना नंतर तर संध्याकाळी ८ नंतर सगळी कडे तोबा गर्दी असते. ह्या गर्दीत गणरायाचे दर्शन फारच दुर्मिळ होते..
गेली दोन - चार वर्षे निदान मानाचे गणपती आणि त्यांच्या आसपास बसणारे काही गणपती तरी नीट बघता यावेत म्हणून पहिल्याच दिवशी बाहेर पडून त्यांचे दर्शन घेतो आहे..
तर यंदाच्या वर्षी ह्या काही निवडक गणपतींचे प्रकाशचित्रे

पहिला मानाचा गणपती
पुण्याचे ग्राम दैवत..
कसबा गणपती गणेशोत्सव मंडळ
.

दुसरा मानाचा गणपती
पुण्याची ग्राम देवता
तांबडी जोगेश्वरी गणेशोत्सव मंडळ
.

तिसरा मानचा गणपती
गुरुजी तालीम गणेशोत्सव मंडळ
.

चौथा मानाचा गणपती
तुळशीबाग गणेशोत्सव मंडळ
.

ह्या मानाच्या गणपती मंडळांचे एक वैशिष्ट्य लक्षात घेण्यासारखे आहे.. ह्या मंडळांची आरास ही अगदी साधी असते उगाच गडबड गोंधळ कधीच नसतो.. यंदा प्रथमच गुरुजी तालीम मंडळानी देखावा उभा केला आहे.. पण हा देखावा सुद्धा अगदी साधाच आहे.. तुळशीबाग मंडळाचा देखावा असतोच पण तिथे सुद्धा अगदी शांतता असते..

आणि हा आपल्या सगळ्यांचाच आवडता
दगडूशेठ हलवाई गणेशोत्सव मंडळ
.

अखिल मंडई गणेशोत्सव मंडळ
शारदा-गजानन - पुण्यातली ही अशी एकमेव मूर्ति आहे..
.

बाबू गेनू गणेशोत्सव मंडळ
.

जिलब्या मारुती गणेशोत्सव मंडळ
.

ह्या सगळ्या मंडळांचे अजून एक खास वैशिष्ट्य असे की एका एका चौकाच्या अंतरा वर ही सगळी मंडळे आहेत.. कसबा गणपती थोडासा लांब आहे पण बाकीचे सगळे अक्षरशः एका चौकाच्या अंतरावर आहेत..
कसबा गणपती पासून सुरुवात करुन तांबडी जोगेश्वरीला जाताना थोडासा रस्ता वाकडा तिकडा करावा लागतो.. पण तांबडी जोगेश्वरी उजवीकडे ठेवून निघाल्यावर सरळ गेलात की उजवीकडे दिसतो तो गुरुजी तालीम.. तिथून तसेच सरळ गेलात आणि डावीकडे बघितलेत की तुळशीबाग.. तुळशीबागेच्या शेजारून गेलात की जिथे बाहेर पडता तिथेच थोडासा डावीकडे दगडूशेठ.. दगडूशेठच्या बरोबर मागे बाबू गेनू... तिथुन सरळ तसेच गेल्यावर मंडईच्या भाजी वाल्यांचे गाळे ओलांडून गेल्यावर मंडईचा गणपती.. आणि तिथून परत बाहेर आल्यावर बाजीराव रोड किंवा चितळे बंधूंच्या दुकानाकडे चालायला सुरुवात केलीत की डावीकडे जिलब्या मारुती..
पण ह्या सगळ्या एवढ्या जवळ जवळच्या गणपतींमुळे मानाचा पाचवा गणपती तेवढा दर वर्षी राहूनच जातो.. त्याच्यासाठी वाट फारच वाकडी करावी लागते...
||ॐ गं गणपतये नमः||