मभागौदि २०२५ शशक - काम क्रोध - स्वाती_आंबोळे

राग येतोच! स्वाभिमान टिकवायचा तर योग्य वेळी यायलाही हवा. पण योग्य वेळ कोणी ठरवायची? काल रात्री मला इतका राग येण्यासारखं काय नवीन झालं होतं?

नवरा मारत नाही, बाहेरख्याली नाही, फक्त रोज रात्री त्याला शय्यासोबत हवीच असते. रोज. ती देणं हे बायको म्हणून माझं कर्तव्य आहे. तसं तो सुनावत राहातो. सासरमाहेरच्या सगळ्या शुभचिंतकांचंही तेच मत आहे. मी त्याला इतकी हवीशी वाटते हा मी गौरव समजायला हवा त्यांच्या मते.
हवीशी?! माझ्या दिसण्यावागण्याबोलण्याचं, हुशारीचं, कर्तृत्वाचं कौतुक वाटणं सोडा, ते समजण्याइतकीही त्याची कुवतच नाही. या कारणासाठी घटस्फोट मिळणंही कठीण आहे आपल्या देशात. वकील म्हणाली तसं.

गेला महिनाभर गादीखाली सुरी होतीच, काल वापरली गेली झालं!