जय मल्हार

जय मल्हार

जेजुरी नगरी । कडे पठारी ।
मार्तंड मल्हारी । विराजतो ।। १॥

शिव अवतरे ।मार्तंड भैरव ।
मल्हारी खंडेराव । देवा नामे ।।२॥

मणि मल्ल दैत्य । देवे संहारिले ।
मल्हारी साजले । नाम थोर ।।३॥

म्हाळसा बाणाई । राणीयांसमवेत ।
अश्वारुढ देव । शोभतसे ।।४॥

भंडारा उधळी । भक्त थोर थोर ।
येळकोट उच्चार । तोषोनिया ।।५॥

मार्गशीर्ष मासी । प्रतिपदे पासोन ।
चंपाषष्ठी सण । विशेषत्वे ।।६॥

रोडगे भरीत । नेवैद्य अर्पिती ।
मल्लारी स्तविती । भक्तजन ।।७॥

दिवटी बुधली । तळी उचलोन ।
येळकोट स्मरण । चांगभले ।।८॥

भंडारा खोबरे । उधळण थोर ।
जै जैकार मल्हार । गर्जताती ।।९॥

संत मुनि जन । सश्रद्ध भाविक ।
दर्शनासी येत । जेजुरीसी ।।१०॥

पैलपार पाववी । देवाजी मल्हारी ।
माथा चरणावरी । कृपाळुवा ।।११॥