आरोग्यवर्धक पेय - चॉको-नाच ड्रिंक [सहेली]

Submitted by सहेली on 11 September, 2024 - 04:47

या नावातला ‘नाच’ हा नाचणीचे लघुरूप आहे, जरा फॅन्सी नाव आकर्षक वाटते म्हणून! (चव घेतली की नाच कराल अशी एक फाको सुचली आहे ती चालवून घ्या.)
साहित्य – एक छोटा चमचा नाचणी पीठ. सत्व वापरण्याची गरज नाही, पण वापरले तरी चालेल. एक कप दूध, अर्धा कप पाणी. दीड चमचा किंवा चवीप्रमाणे साखर, एक छोटा चमचा कोको पावडर (गोड नसलेली) व्हॅनिला किंवा बटरस्कॉच इसेन्स, पौष्टिक पावडर* [खालची टीप बघा.] यातले इसेन्स आणि पौष्टिक पावडर पूर्णतः ऑप्शनल आहे, पण इसेन्समुळे स्वाद खुलतो आणि पौष्टिक पावडरमुळे गुणवत्ता, त्यामुळे वापरा असा आग्रह करेन.

* पौष्टिक पावडर म्हणजे मखाणे, आवडीच्या तेलबिया, काजू-बदाम-पिस्ते इत्यादी सुकामेवा खमंग भाजून पूड करून त्यात सम प्रमाणात खारीक पावडर मिसळून ठेवते मी घरात. स्मूदीज, शिकरण, केक अशा कोणत्याही गोडसर पदार्थावर घालून वापरता येते.)

IMG_20240911_092433.jpg
कोको पावडर, पौष्टिक पावडर आणि नाचणी पीठ.

कृती – एका पातेल्यात नाचणी पावडर, दूध, साखर, कोको पावडर एकत्र करा. नीट ढवळून सर्व जिन्नस एकजीव करून घ्या. दहा मिनिटांनी पातेलं गॅसवर चढवा. तोवर नाचणीचे पीठ दुधात नीट मिसळले जाते. एकदा गॅस सुरू केल्यावर आजूबाजूला कुठेही लक्ष न ते मिश्रण ढवळत रहा, नाहीतर गुठळ्या होणे, खाली लागणे असे उपद्व्याप होऊ शकतात. दोनतीन मिनिटांतच मिश्रण शिजून आळायला लागेल. जर जास्त दाट वाटले तर थोडे थोडे पाणी (दूधही वापरू शकता) वापरून आवडीनुसार पातळ करून घ्या. मिश्रणाला तकाकी आली की गस बंद करा. त्यात इसेन्स आणि पौष्टिक पावडर घालून ढवळा आणि गरम, कोमट आवडीप्रमाणे आस्वाद घ्या किंवा द्या!
जास्त लाड आले असतील तर वरून किसलेले चॉकलेट किंवा चॉकोचिप्सने सजवा. जरा थंडी असेल तेव्हा हे गरम पेय पीत बसायला फार मस्त वाटते.

विषय: 
पाककला
Groups audience: 
मायबोली गणेशोत्सव २०२४
Group content visibility: 
Public - accessible to all site users
शेअर करा

Nice

Submitted by avani1405 on 11 September, 2024 - 04:55

मस्त रेसिपी. करून बघेन नक्की.
यावेळच्या सगळ्या entries बघून असं वाटतंय जगातले सगळे टॅलेंटेड लोक माबोवर जमा झालेत.
एक से एक मिम्स, रेसिपीज , फोटोज, शशक.
संयोजक मंडळ तर खूपच खुश असणार . अजून सगळे धागे वाचून व्हायचे आहेत.
महिना तरी लागेल .....

Submitted by सामी on 18 September, 2024 - 09:42

ही चव इमॅजिन नाही करता येते. सगळे जिन्नस आहेत, लगेच करुन बघतो.
यंदा नाचणी फॉर्मात आहे का? कविनची पण अशीच सेव्हरी रेसिपी होती.

Submitted by अमितव on 18 September, 2024 - 09:55

कविनची पण अशीच सेव्हरी रेसिपी होती.>> हो मी पाण्यात शिजवते कारण ज्याला दुधात हवे त्याला दुध घालून ब्लेंड करुन देते आणि ज्याला ताकात हवे त्याला सेव्हरी वर्जन ब्लेंड करते Lol

मी लेकीला करुन दिले असे चॉको चिप्स वापरून. तिला आवडले हे ही व्हेरिएशन

एरव्ही तिला कधी नाचणी+सत्तू +ड्रायफ्रूट पावडर एकत्र करुन शिजवून दुधात ब्लेंड करुन देते कधी साखर कधी खजूर घालून.

Submitted by कविन on 18 September, 2024 - 12:43

चिकट होते का? गार झाले की - नाही, अजिबात चिकट होत नाही.
मला हे नाव फार आवडलं रेसिपीच. - खूप धन्यवाद!

Submitted by सहेली on 20 September, 2024 - 21:12

यावेळच्या सगळ्या entries बघून असं वाटतंय जगातले सगळे टॅलेंटेड लोक माबोवर जमा झालेत - टॅलेंटेड लोकांच्या यादीत घातल्याबद्दल धन्यवाद!

लेकीला करुन दिले असे चॉको चिप्स वापरून. तिला आवडले हे ही व्हेरिएशन - अरे वाह, लगेच करून बघितलं! धन्यवाद!

सगळे जिन्नस आहेत, लगेच करुन बघतो - बघितलं का करून? कशी वाटली चव?

Submitted by सहेली on 20 September, 2024 - 21:16

अभिनंदन

हल्ली आंबील केले नसले की ही रेसिपी करते लेकीसाठी. तिलाही आवडलेय आणि केकसाठी म्हणून आणलेले चोको चिप्स आहेत शिल्लक ते ही संपतायत यामुळे

Submitted by कविन on 1 October, 2024 - 00:30