अंत: अस्ति प्रारंभ: - १ - कल्पनाशक्तीचा आविष्कार! - ऋन्मेऽऽष

त्याच्या हातात जादू होती. कॅनव्हास रंगत होता. डोंगर, दरी, रस्ता, नदी.... आणि कावळा.

अरेss आताच तर रेखाटला होता.. गेला कुठे???

अचानक खिडकीवर सणकन् काहीतरी आदळल्याचा आवाज आला. एक कावळा उडत येऊन काचेवर धडकला होता.

त्याने खिडकीबाहेर नजर टाकली. समोर तोच डोंगर! जो त्याने लहानपणी जाळला होता. कोणाचाही त्यावर विश्वास नव्हता.

बघताबघता त्या डोंगराने पेट घेतला. तो घाबरला. पण काय होतेय हे त्याच्या लक्षात आले.

कल्पनाशक्तीचा आविष्कार!

त्याने मायबोली उघडले. माझे लेखन.
घाईघाईतच "तो" धागा उघडला.
संपादनावर टिचकी मारली..
आणि...
आणि
खेळ खल्लास!

*तुमची संपादनाची मुदत उलटून गेली आहे!*

त्याने पुन्हा एकदा पेटलेल्या डोंगराकडे पाहिले, लॅपटॉप उचलला आणि अ‍ॅडमिनकडे धाव घेतली.