जोवरी उजाडत नाही!

Submitted by मुग्धमानसी on 26 July, 2024 - 13:16

श्वासांच्या पाठीवरती
दु:खाची हळवी रेघ
जगण्याचे कातर मेघ
जे कधी बरसले नाही!

आकाशाच्या दरबारी
फत्थरही उजळून जावे
निर्वात कुणी मोजावे
जे कधी प्रकाशत नाही!

आश्वस्त नदीच्या काठी
पहुडले कितीक किनारे
ते तिच्यात बुडले सारे
पण तिच्यात भिजले नाही!

ओलेत्या रात्रीपाशी
एकांत बोचरा निजतो
डोळ्यांना मिटवू धजतो
पण क्षणांस विझवत नाही!

एकेक पळाच्या पाठी
जगण्याची घरंगळ माळ
ओटीत बांधला काळ
जोवरी उजाडत नाही!

विषय: 
काव्यलेखन
शब्दखुणा: 
मानस कविता
Groups audience: 
गुलमोहर - कविता
Group content visibility: 
Use group defaults
शेअर करा

>>>

ओलेत्या रात्रीपाशी
एकांत बोचरा निजतो
डोळ्यांना मिटवू धजतो
पण क्षणांस विझवत नाही!

एकेक पळाच्या पाठी
जगण्याची घरंगळ माळ
ओटीत बांधला काळ
जोवरी उजाडत नाही!

अप्रतिम

Submitted by बेफ़िकीर on 28 July, 2024 - 10:41