बॉलीवूडचा बाप येतोय.. गदर २.० ! सन्नी देओल इज बॅक.

गदर २.०
सन्नी पाजींच्या फिल्मचं शूटींग संपत आलेलं आहे. आता ही फिल्म रिलीज व्हायच्या वाटेवर आहे.
गदरने भारतात सर्वाधिक पाहिली गेलेली फिल्म हा रेकॉर्ड आपल्या नावावर केलेला आहे. लगान पेक्षा अर्ध्या बजेट मधे बनलेल्या (३० करोड) या फिल्मने लगान पेक्षा जास्त बिझनेस केला. लगान सुद्धा चालली. पण तितका बिझनेस करायला लगानला दीड वर्षे लागलं. त्या वेळच्या ३० करोड मधे म्हणजे आजच्या दीडशे करोडच्या बजेट मधे बनलेल्या या फिल्मचा त्या वेळचा बिझनेस आजच्या जमान्यात पाचशे कोटी (फक्त तिकीट बारीवर) आहे.

गदर २.० ला घेऊन जबरदस्त उत्सुकता आहे. सनीची जादू आजही कायम आहे हे चुप च्या यशावरून समजलेच आहे.
आजही " ये ढाई किलो का हाथ जब पडता है ना " सारखे असंख्य डायलॉग्ज लोकांच्या स्मरणात आहेत. गदर मधले डायलॉगज तर सनीपाजी पडद्यावर असल्यानेच खरे वाटू शकतात.

त्या वेळी गदरने वेड लावलं होतं.
तुम्हारा पाकिस्तान जिंदाबाद, लेकीन हमारा हिंदुस्तान जिंदाबार था, है और रहेगा सारखे ढांसू लायलॉग्ज, सनी पाजीचं हँडपंप उखाडून आग ओकणार्‍या नजरेनं पाहणं हे सगळंच लोकांना पुन्हा पहायचंय.

अमिताभ बच्चनची जादू ओसरत असताना जर बॉलीवूड कुणी सावरलं असेल तर ते सनीपाजीच. अँगी यंग मॅनचा उग्र अँगी मॅन झाला. सुरूवातीचा हळवा सनी आग ओकणारा युवक झाला. अर्जुन, यतीम, डकैत, घायल, जीत, घातक सारखे असंख्य पिक्चर्स सनीच्या या इमेजने तारून नेले. सनीच्या या इमेजचा फायदा घ्यायला निर्मात्यांची रांग लागायची. पण सगळेच पिक्चर्स चांगले बनत नसत. मग सनीला फटका बसू लागला.

ज्या अनिल शर्मांनी गदर बनवली त्यांचाच सनीला घेऊन बनवलेल्या स्पाय मूव्ही "हिरो" ने सनीच्या इमेजला उतरती कळा लागली. मग सनी पाजी पण भरकटले. दिल्लगी सारखे सिनेमे बनवू लागले. भावासाठी भगतसिंग बनवला. त्यात नुकसान झाले. सनी पाजी दिग्दर्शक म्हणून कधीच चांगले नव्हते. पण त्यांना ते समजले नाही. नुकसान होत असतानाही दिल्लगी बनवला, यमला पगला दिवाना बनवला आणि अजूनच खोलात गेले. त्यातून सावरता न आल्याने मग ते बॉलीवूडपासून दूर झाले.

पण अशा मॅनली हिरोंना वय, काळाचं बंधन नसतं. धर्मेंद्र पाजी तर सत्तरीतही फौलादसिंग साकारत होते. हुकूमत सारखे सुपरहीट पिक्चर देत होते. अशा बिनडोक पिक्चरचं एकमेव अ‍ॅसेट असायचं. धरम पाजी. तीच गोष्ट सनी पाजीला सुद्धा लागू आहे.

नुकताच घायल २.० येऊन गेला. सनी पाजीचं दिग्दर्शन जरासं सुधारलेलं दिसलं. पण सफाईदार नाही. पण प्रेक्षकांचं सनीवर अजून प्रेम आहे हे घायल फिरसे ने दाखवलं. मग चुपने पण ते सिद्ध केलं.

या पार्श्वभूमीवर गदर २.० अनिल शर्माच डायरेक्ट करत असल्याने जबरदस्त उत्सुकता ताणली गेली आहे. ११ ऑगस्ट रोजी पिक्चर रिलीज होत आहे . आताच ओटीटी प्लॅटफॉर्म्स कडून चढत्या क्रमाच्या ऑफर्स गदर २.० साठी येत आहेत. या फिलमचा ओटीटी राईट बॉलीवूडमधले रेकॉर्ड करण्याची शक्यता आहे.

रिलीज आधीच ब्लॉकबस्टर हिट होण्यात वर्ल्ड टीव्ही राईटस आणि ओटीटी राईट्ससाठी चाललेली स्पर्धा मोठी भूमिका बजावणार आहे. तिकीट बारीवर होणारे कलेक्शन हे फक्त पुढे मोजायचे.

आपल्यापैकी बर्‍याच जणांचे पहिले प्रेम बॉलीवूड आहे. त्यावर आक्षेप नाही. पण मराठी पिक्चर्स नक्की बघा. वर्षातून दोन पिक्चर्स जास्तीत जास्त संख्येने पहा. बॉलीवूडचे प्रेम जपत जपत मराठीही पहा.

गदरची रिलीज डेट निश्चित असल्याने त्या काळात धंदा करू शकणार्‍या मराठी पिक्चर्सनी एखादा आठवडा संयम पाळावा. मेन शोज मिळत असतील तरीही या मोठ्या सिनेमापुढे रिलीज करण्याचा धोका पत्करू नये. कारण आपले मराठी पब्लीक साऊथ सारखे कट्टर नाही. एकदा गदर पाहिल्यावर दोन तीन आठवडे थेटरकडे फिरकणे होत नाही. या गोष्टींचा विचार करावा. मराठी पिक्चरने पण आता ट्रिकी व्हावं.

अर्थात सन्नी पाजी सारख्या मॅनली हिरोजची अ‍ॅक्शन पहायला मराठी सहीत सगळेच आतुर असणार यात शंकाच नाही.
त्या वेळी हँडपंप , आता काय उखडतात सनी पाजी ही उत्सुकता आहे.

पोस्टर्सवरून बैलगाडीचं चाक उचलून सनीपाजी फेकताहेत असं दिसतंय.
तोच गुस्सा, तेच आग ओकणारे डोळे, तेच ढांसू डायलॉग्ज, तीच ती अ‍ॅक्शन आणि तीच जादू अनुभवयाला उत्सुक आहे.
तुम्ही ?